Aýyl sharýashylyǵy mınıstrligi bıyl forvardtyq satyp alýǵa qansha qarjy bóledi

ASTANA. KAZINFORM – Bıyl Aýyl sharýashylyǵy mınıstrligi AÓK sýbektilerinen aldyn ala tólem jasaý arqyly ónim satyp alýǵa 30 mlrd teńge bóledi. Bul týraly Kazinform agenttiginiń resmı saýalyna vedomstvo jaýabynda aıtylǵan.

— Bıyl «Azyq-túlik korporatsııasy» UK» AQ forvardtyq satyp alý boıynsha jumysyn jalǵastyrady. Ósimdik sharýashylyǵy ónimderin forvardtyq satyp alý baǵdarlamasy boıynsha kóktemgi dala jumystaryn júrgizý úshin sharýalardy qarjylandyrýǵa ótinimder qabyldaý bastaldy. Osy maqsatta kelesi daqyldarǵa 30 mlrd teńge bólý josparlanyp otyr: 3-synypty bıdaı, qatty bıdaı, 2-synypty arpa, maıly zyǵyr tuqymy, kúnbaǵys, raps, - delingen habarlamada.

Mınıstrliktiń málimetinshe, ótinim berý úshin tuqymnyń bar ekenin rastaý nemese olardy satyp alǵanyn rastaıtyn qujattardy usyný qajet. Tıisti talapqa saı AÓK sýbektilerine aldyn ala tólem QQS esebimen mynandaı baǵamen beriledi:

- jumsaq jáne qatty bıdaı – 50 000 teńge/tonna;

- arpa – 40 000 teńge/tonna;

- kúnbaǵys – 80 000 teńge/tonna;

- maıly zyǵyr jáne raps tuqymdary – 90 000 teńge/tonna.

Forvardtyq kelisimsharttardyń talaptary boıynsha, qarajat aýyl sharýashylyǵy kásipornyna áleýmettik-kásipkerlik korporatsııadan, «Damý» kásipkerlikti damytý qory» AQ nemese ekinshi deńgeıdegi bankten kepildik jasalǵannan keıin ǵana beriledi.

Aıta keteıik, buǵan deıin Májilis depýtaty «Azyq-túlik kelisimshart korporatsııasy» UK» AQ men sharýalar arasyndaǵy forvardtyq satyp alý kelisimshartyn qaıta qaraýdy usynǵan edi. Onyń aıtýynsha, kelisimniń qazirgi nusqasy naryq talabyna jaýap bere almaı otyr.