Aýyl sharýashylyǵy, logıstıka, JI: Qazaqstan ınvestıtsııanyń jańa baǵytyn qalyptastyryp jatyr
ASTANA. KAZINFORM — Qazaqstan men Qytaı ınvestıtsııalyq áriptestiktiń jańa kezeńine ótti. Bul týraly KAZAKH INVEST ulttyq kompanııasy AQ basqarma tóraǵasy Sultanǵalı Kınjaqulov Jibek Joly telearnasynyń «Búgin Live» baǵdarlamasynda aıtty.
Onyń sózinshe, Prezıdent Qasym-Jomart Toqaevtyń Shanhaıǵa jumys sapary Qazaqstannyń syrtqy ekonomıkalyq saıasaty úshin mańyzdy oqıǵalardyń biri boldy. Sapar aıasynda Memleket basshysy Qytaı Tóraǵasy Sı Tszınpınmen kelissózder ótkizip, jetekshi halyqaralyq kompanııalardyń basshylarymen kezdesti. Nátıjesinde jalpy quny 15 mıllıard dollardan asatyn 70-ten astam kommertsııalyq kelisimge qol qoıylǵan.
– Jobalar ónerkásip, logıstıka, tsıfrlyq tehnologııalar, energetıka jáne agroónerkásip salalaryn qamtıdy. Osy rette eki el arasyndaǵy saýda-sattyqty aıtsaq, byltyr onyń kólemi 49 mıllıard dollarǵa jetti. Bul – rekordtyq kórsetkish. Al Qytaı Qazaqstan ekonomıkasyna 30 mıllıard dollardan astam ınvestıtsııa salǵan, – dedi Sultanǵalı Kınjaqulov.
Endigi mindet – qazaqstandyq ónimderdiń eksporttyq áleýetin arttyryp, ásirese Qytaı naryǵyndaǵy úlesin kóbeıtý. Bul úshin óndiristi ǵana emes, logıstıkalyq ınfraqurylymdy qatar damytý qajet.
– Máselen, Qytaıdaǵy azyq-túlik naryǵynyń kólemi 1,3–1,4 trıllıon dollardy quraıdy. Biz Qazaqstanda óndirilgen daıyn azyq-túlikti osy naryqqa shyǵarýdy maqsat etip otyrmyz. Sonymen qatar logıstıkany qalyptastyrý mańyzdy. Qorǵastan shyqqan taýardyń Qytaıǵa ári qaraı Reseıge jyldam jetýi úshin jańa baǵyttar qalyptastyryp, qoımalar ashý qajet, – dedi ol.
Osy maqsatta elimizde iri logıstıkalyq jobalar júzege asyrylyp jatyr. Atap aıtqanda, Qorǵas pen Kaspıı baǵyty boıynsha jańa ınfraqurylym qalyptasyp, halyqaralyq ınvestorlar tartylyp jatyr.
– Quryqta jańa port salynady. Bul – strategııalyq joba. Sebebi Qytaıdan shyqqan júk Eýropaǵa jetýi kerek. Eýropa men Qytaı arasyndaǵy taýar aınalymy shamamen 1 trıllıon dollardy quraıdy. Eger sonyń 3 paıyzy Qazaqstan aýmaǵy arqyly ótse, elimiz úshin ekonomıkalyq jaǵynan aıtarlyqtaı tıimdi bolady, – dedi spıker.
Sonymen qatar ınvestıtsııa tartýda basymdyq beriletin salalar ózgerip keledi. Buryn negizgi nazar munaı-gaz jáne energetıkaǵa aýdarylsa, búginde ınvestorlardyń qyzyǵýshylyǵy aýyl sharýashylyǵy, logıstıka, tsıfrlandyrý jáne joǵary tehnologııalyq óndiristerge oıysyp otyr.
– Elimizge jasandy ıntellekt salasyndaǵy kompanııalardy tartý baǵytynda jumys júrgizilip jatyr. Sonymen birge elektrondy kommertsııa Almatyda qarqyndy damyp keledi. Mashına jasaý men data-ortalyqtar salý da kún tártibindegi mańyzdy baǵyttardyń biri, – dedi ol.
Spıkerdiń aıtýynsha, geosaıası ózgeristerge qaramastan, elimiz halyqaralyq ınvestorlar úshin tartymdylyǵyn saqtap otyr. Bul rette basymdyq álemdik deńgeıdegi transulttyq kompanııalarǵa berilgen.
– Máselen, PepsiCo kompanııasy Almaty oblysynda zaýyt saldy. Kásiporyn qyrkúıek aıynda iske qosylady. Onyń jetkizý tizbegine 23 kompanııa kiredi. Qazirdiń ózinde 30 qazaqstandyq kásiporyn osy júıe arqyly kartop jetkizip otyr. Bul – jańa jumys oryndary, qosymsha tabys pen jergilikti bıznestiń damýyna múmkindik, – dedi Sultanǵalı Kınjaqulov.
Baıqaǵanymyzdaı, sheteldik ınvestorlarmen jasalatyn árbir joba jergilikti ekonomıkanyń damýyna baǵyttalǵan. Kelisimderde qazaqstandyqtardy jumyspen qamtý, óndiristi jergiliktendirý jáne tehnologııa transferi basty talaptardyń biri retinde qarastyrylady. Máselen, Mars kompanııasy Almatyda janýarlarǵa arnalǵan azyq óndiretin kásiporyn ashqan. Mundaı jobalar jańa óndiristerdi iske qosyp qana qoımaı, zamanaýı tehnologııalardy engizýge de múmkindik bermek.
Eske salaıyq, elimizde týrızmge salynǵan ınvestıtsııa 1,2 trln teńgeden asty.
