Aýyl sharýashylyǵy kooperatıvterin uıymdastyrý turaqty jolǵa qoıylǵan - Tolamısov
Senator Amangeldi Tolamısov búginde elimizdiń ár aımaǵynda aýyl sharýashylyǵyn damytý boıynsha josparlanǵan jumystar júıeli túrde júrgizilip jatqanyn aıtty.
«Prezıdenttiń saılaýaldy baǵdarlamasyn iske asyrýdaǵy negizgi baǵyttyń biri – aýyl sharýashylyǵyn damytý. Ásirese, jaıylym jerleri men egistik alqaptarǵa baı aımaqtardyń ahýalyn nazarda ustaý asa mańyzdy. Olar elimizdiń ár aımaǵynyń ekonomıkasyna, hal-ahýalyna tikeleı áser etetin lokomotıv der edim.
«Aýyl sharýashylyǵy ekonomıkanyń jańa qozǵaýshy kúshine aınalady. Aldaǵy jyldarda aýyl-aımaqty órkendetýge basymdyq beremiz. Biz aýyldyq jerdi jumyspen jappaı qamtý úshin jaǵdaı jasaımyz, aýyl turǵyndarynyń kásipkerlik bastamalaryn qoldaımyz. Turǵyndarǵa jer qoljetimdi bolady. Ol úshin iri jer ıelerinen paıdalanylmaıtyn jer telimderin memleket menshigine qaıtarý jumystaryn jandandyramyz», - delingen saılaýaldy baǵdarlamada. Soǵan oraı búginde josparlanǵan jumystardy júıeli túrde júrgizýge kúsh salýdamyz. Ásirese, sý únemdeıtin tıimdi tehnologııa engizý jumystary, melıoratsııa jáne sýarý júıesin qalpyna keltirý máselesine basa nazar aýdarylyp jatyr. Al, aýyl sharýashylyǵy kooperatıvterin uıymdastyrý aýqymdy joba retinde turaqty jolǵa qoıylǵan.
Aýyl – altyn besik. Bul sózdiń mán-maǵynasyn bir kisideı qabyldaǵanymyzben, búgingi ýaqyt úshin ol asa aýqymdy túsinik. Sóz basynda atap ótkendeı, aýyl sharýashylyǵy eldiń tynys-tirshiliginiń, ekonomıkasynyń basty qozǵaýshy kúshi. Aýyl órkendep, el damı bersin!», - dedi Amangeli Tolamısov.
