Aýyl sharýashylyǵy qyzmetkerleriniń aılyq tabysy eki ese ósýi múmkin
ASTANA. KAZINFORM — Aýyl sharýashylyǵy mınıstrligi sala mamandarynyń tabysyn arttyrý jónindegi qaýly jobasyn daıyndap, Úkimetke usyndy.
Qujat joǵary jetistikterge jetken, shuǵyl ári mańyzdy mindetterdi atqarǵan, sondaı-aq kúrdeli tapsyrmalardy oryndaǵan qyzmetkerlerdiń aılyǵyna qosylatyn ústemeaqyny 100%-ǵa deıin kóterýdi kózdeıdi.
— Joba Qazaqstan Respýblıkasy Úkimetiniń 2015 jylǵy 31 jeltoqsandaǵy № 1193 qaýlysyna 15-qosymshaǵa ózgeris engizýdi kózdeıdi. Atap aıtqanda, mekemeni damytýǵa baǵyttalǵan jumys, tájirıbede ozyq ádisterdi qoldaný, jumystaǵy joǵary jetistikter, erekshe mańyzdy nemese shuǵyl jumystardy oryndaý, sondaı-aq jumystyń kúrdeliligi men qarqyndylyǵy úshin belgilenetin ústemeaqynyń mólsherin bazalyq laýazymdyq aılyqaqynyń 50 paıyzynan aspaıtyn mólsherden laýazymdyq aılyqaqynyń 100 paıyzyna deıin ulǵaıtý usynylady, — delingen qaýlyda.
Mınıstrliktiń málimdeýinshe, jobany qabyldaý memlekettik sortsynaý júıesi qyzmetkerleriniń eńbekke yntasy men qyzyǵýshylyǵyn arttyrýǵa, kadrlyq áleýetti saqtaýǵa, jańa bilikti mamandardy tartýǵa jáne sort synaý júıesiniń ınnovatsııalyq áleýetin damytýǵa múmkindik beredi. Sonymen qatar teris áleýmettik-ekonomıkalyq, quqyqtyq jáne ózge de saldarlary bolmaıdy.
Qujat 17 tamyzǵa deıin qoǵamdyq talqylaýǵa usynyldy.
Aıta keteıik, buǵan deıin asyl tuqymdy mal sharýashylyǵy salasyndaǵy qujat nysandary qaıta qaralatynyn jazǵanbyz.
Sonymen birge Prezıdent Aýyl sharýashylyǵy mınıstrine azyq-túlik qaýipsizdigin nyǵaıtýdy tapsyrdy.
