Aýyl sharýashylyǵy qyzmetkerleri úshin zeınet jasyn qysqartý usynyldy
ASTANA. KAZINFORM — Aýyl sharýashylyǵy vıtse-mınıstri Amanǵalı Berdalın Úkimet otyrysynda osyndaı usynys aıtty.
Onyń aıtýynsha, Qazaqstannyń agroónerkásiptik kesheninde 285,5 myń ónim óndirýshi jumys isteıdi, olar shamamen 1 mln adamdy jumyspen qamtyp otyr.
— AÓK salalary boıynsha shamamen 6,5 myń mamanǵa qajettilik bar, onyń ishinde bilikti qyzmetkerler boıynsha — 3,5 myńnan astam jumys orny bar. Mınıstrlik jańa jumys oryndaryn qurýǵa jáne ózin-ózi jumyspen qamtyǵandardy uıymdasqan sharýashylyqtarǵa kóshirýge jaǵdaı jasap otyr. «Aýyl amanaty» baǵdarlamasyn iske asyrý jyldary aýylda 115 mlrd teńgege 17 myńnan astam mıkrokredıt berilip, shamamen 20 myń jańa jumys orny quryldy, — dedi A. Berdalın Úkimettiń búgingi otyrysynda.
Sonymen birge, 2025 jyly 616 mlrd teńgege 285 ınvestıtsııalyq jobany iske asyrý josparlanyp otyr, bul 6,3 myń turaqty jáne ýaqytsha jumys ornyn qurýǵa múmkindik beredi.
Úshinshiden, eńbek resýrstary balansynyń boljamymen agrarlyq mamandyqtarǵa jyl saıyn shamamen 4 myń grant bólinedi. Aýyldan shyqqan talapkerlerdi yntalandyrý úshin aýyldyq kvota qoldanylady. Ol búkil memlekettik bilim berý tapsyrysynyń 30%-ynan 35%-yna deıin ulǵaıtyldy. Aýyl kvotasymen oqyǵan túlekter oqýyn bitirgen soń keminde úsh jyl aýylda jumys isteýi kerek.
— Sońǵy jyldary zamanaýı aýyl sharýashylyǵy ýaqyt talabymen jańaryp, tsıfrlandyrý esebinen tehnologııalyq jáne ónimdi salaǵa aınaldy. Sonymen birge, aýyl sharýashylyǵy qyzmetkerleriniń mártebesi artyp keledi, ony odan ári kóterý úshin jalaqyny arttyrý, zeınet jasyn tómendetý, aýyl turǵyndaryna áleýmettik tólemderge joǵarylatylǵan koeffıtsıent qoldaný usynylyp otyr. Budan bólek, aýylda turǵyn úı qurylysyna arnalǵan sýbsıdııa normasyn arttyrý múmkindigin qarastyrý usynylady. Bul sharalar eńbek jaǵdaıyn jaqsartýǵa, jańa kadrlardy tartýǵa jáne aýylda adamdardy turaqtandyrýǵa múmkindik beredi, — dedi Aýyl sharýashylyǵy vıtse-mınıstri.
Aıta keteıik, elimizde zeınetaqy da avtomatty túrde taǵaıyndalatyn boldy.
Eger zeınetker jeke shotynan úsh aı boıy tólem almasa, onyń zeınetaqysy ýaqytsha toqtatylýy múmkin.