Aýyl sharýashylyǵy derekterin biriktiretin «E-AÓK» platformasy iske qosylady

ASTANA. KAZINFORM –  «E-AÓK» jobasyn tolyqqandy iske asyrý 2028 jylǵa deıin mejelengen. 

Memleket basshysynyń tapsyrmasyna sáıkes, Aýyl sharýashylyǵy mınıstrligi aýyl sharýashylyǵy salasyndaǵy derekterdiń anyqtyǵy men senimdiligin qamtamasyz etýge baǵyttalǵan «E-AÓK» platformasyn qurýdy josparlap otyr.

Atalǵan platforma salanyń barlyq aqparattyq júıelerin biriktirip, derekterdi ortalyqtandyryp saqtaýdy qamtamasyz etedi. Onyń negizinde salalyq kórsetkishterdi keshendi ári úzdiksiz monıtorıngteýge múmkindik beretin damyǵan BI-taldaý júıesi qalyptastyrylady. Bul júıe sýbsıdııalaý jáne memlekettik qyzmetter kórsetý úderisteriniń ashyqtyǵyn qamtamasyz etip, negizgi tıimdilik kórsetkishterin (KPI) baqylaýǵa, sondaı-aq ýaqtyly ári negizdelgen basqarýshylyq sheshimder qabyldaý úshin qajetti jedel jáne taldamalyq eseptilikti qalyptastyrýǵa múmkindik beredi.

Platformany qurý barlyq qatysýshy úshin birqatar artyqshylyq usynady. Máselen, memleket óz kezeginde óndiris, sýbsıdııalaý jáne ınvestıtsııalar boıynsha senimdi taldamalyq bazaǵa ıe bolady; fermerler ákimshilik júktemeni azaıta otyryp, qyzmetter men qarjylyq quraldarǵa qoljetimdilikti jeńildetedi; al qarjy sektory táýekelderdi baǵalaý múmkindikterin keńeıtedi.

Memleket derekterge baqylaýdy saqtaıdy, al barlyq sheshimder Qazaqstannyń zańnamasyna sáıkestendirilip, tehnologııalyq beıtaraptyq pen básekelestik qaǵıdattaryn saqtaı otyryp qabyldanady.

Platformany qurý jumystary salalyq mamandar men negizgi qatysýshylardyń qajettilikterin eskerip, kezeń-kezeńimen júzege asyrylady.

Aıta ketelik elimizden ósimdik maıyn qaı elder kóptep satyp alatyny týraly jazǵan edik.