Aýyl sharýashylyǵy daqyldaryn óńdeıtin óndiris 1 myń jumys ornyn ashady — Úkimet
ASTANA. KAZINFORM — Oljas Bektenov Fufeng Group basshysy Lı Sıýechýnmen qazaqstandyq aýyl sharýashylyǵy ónimderin tereń óńdeý boıynsha jańa jobany iske qosýdy talqylady. Bul týraly Úkimettiń baspasóz qyzmeti habarlady.
Qazaqstan Premer-mınıstri Oljas Bektenov qytaılyq Fufeng Group kompanııasynyń basqarma tóraǵasy Lı Sıýechýnmen agroónerkásiptik keshen jáne kómir hımııasy salasyndaǵy yntymaqtastyqty talqylady. Tereń óńdeýge basa nazar aýdara otyryp, uzaqmerzimdi ınvestıtsııalyq yntymaqtastyq máselelerine den qoıyldy.
Fufeng Group Company Limited — amınqyshqyldary men olardyń týyndylaryn óndirýge, sondaı-aq osy saladaǵy zertteýler men ázirlemelerge mamandanǵan bıo-fermentteý ındýstrııasyndaǵy álemdik kóshbasshy. Kompanııa álemdegi eń iri natrıı glýtamaty men ksantan shaıyryn óndirýshi sanalady.
• Fufeng Group-tyń Qazaqstanda krahmaldy qant óndirý jáne amınqyshqyldaryn ashytý zaýyttaryn, sondaı-aq kómir jylý elektr stansasy men aǵyndy sýlardy tazartý stansasyn qamtıtyn júgerini tereń óńdeýge arnalǵan tiginen ıntegratsııalanǵan ónerkásiptik park qurý týraly usynysy talqylandy.
Bıdaı men júgerini tereń óńdeý krahmal, amınqyshqyldary, natrıı glýtamaty jáne ksantan shaıyrynyń qosylǵan quny joǵary ónimderdi alýǵa múmkindik beredi, olardyń baǵasy shıkizat qunynan 10-15 ese joǵary. Joba aıasynda 1 myń jumys ornyn ashý josparlanýda, ınvestıtsııa kólemi shamamen $300-350 mln-dy quraıdy.
• Lı Sıýechýn kompanııanyń aýyl sharýashylyǵy daqyldaryn ósirý úderisine qatysýǵa, sapaly tyńaıtqyshtar berýge jáne qazaqstandyq mamandarmen zamanaýı agrotehnologııalar boıynsha tájirıbe almasýǵa daıyn ekendigin atap ótti. Sondaı-aq ınvestor kómir-hımııa sektoryndaǵy yntymaqtastyqqa qyzyǵýshylyq bildirdi.
Qazaqstan Premer-mınıstri Memleket basshysynyń ekonomıkanyń ósýin qamtamasyz etý jónindegi alǵa qoıǵan maqsatyna qol jetkizý sheńberinde agroónerkásiptik keshenge ınvestıtsııalardyń mańyzdylyǵyn atap ótti.
«Qazaqstan qosylǵan quny joǵary ónim óndirisin ulǵaıtýǵa umtylýda, al astyqty tereń óńdeý keshenderin salý basym baǵyt sanalady. Bul — ekonomıkany ártaraptandyrýǵa jáne eksporttyq múmkindikterdi keńeıtýge múmkindik beretin strategııalyq baǵyt. Bizde bul úshin qajettiniń bári bar: ınfraqurylym, shıkizat resýrstary jáne memlekettik qoldaý sharalary. Joba agroónerkásiptik sektorda qosymsha qun qurýdyń jáne ozyq tehnologııalar engizýdiń jarqyn úlgisi bolmaq. Úkimet tarapynan qajetti qoldaý kórsetiledi», — dedi Oljas Bektenov.
Qazaqstan naryǵynda Fufeng Group sııaqty iri oıynshynyń paıda bolýy aýyl sharýashylyǵy daqyldaryn, ásirese, astyq egetin soltústik óńirlerde ártaraptandyrýǵa yqpal etetin bolady. Kompanııanyń qazaqstandyq fermerlermen josparly offteık-kelisimsharttar jasasýy tıimdi yntymaqtastyqqa kepildik beredi.
Kezdesý qorytyndysy boıynsha Premer-mınıstr Aýyl sharýashylyǵy, Ónerkásip jáne qurylys mınıstrlikterine Fufeng Group kompanııasymen ınvestıtsııalyq kelisimdi jedel túrde daıyndaýdy tapsyrdy.
