Aýyl sharýashylyǵy daqyldaryn ártaraptandyrý máselesi talqylandy
ASTANA. KAZINFORM - Agrarlyq máseleler komıtetiniń tóraǵasy Serik Egizbaevtyń jetekshiligimen Qostanaı oblysynda komıtettiń kóshpeli otyrysy ótti. Depýtattar memlekettik organdardyń ókilderimen jáne astyqty óńirdiń sharýalarymen birlesip, aýyl sharýashylyǵy daqyldaryn ártaraptandyrý, bıylǵy ónimdi saqtaý jáne ótkizý máselelerin talqylady.
Jıyndy ashqan Serik Egizbaev Aýyl sharýashylyǵy mınıstrligi men oblys ákimdikteriniń aldynda monokýltýra egistigin qysqartý arqyly aýyl sharýashylyǵy daqyldarynyń alqaptaryn ártaraptandyrýdy qamtamasyz etý mindeti turǵanyn atap ótti. Memleket basshysy ótken jylǵy Joldaýynda osy baǵyttaǵy jumysty taǵy da jandandyrýdy tapsyrǵan bolatyn.
– Qazirdiń ózinde oń nátıjeler bar. Maıly daqyldar alqaby 2,9 mln gektarǵa deıin ulǵaıtylyp, ylǵaldy kóp qajet etetin daqyldar alqaby qysqartyldy. Memleket bul ózgeristerdi tuqym, tyńaıtqyshtar men ósimdikterdi qorǵaý quraldarynyń qunyn arzandatý, sýarý jabdyqtaryn sýbsıdııalaý arqyly júıeli túrde qoldap otyr. Bul sharanyń barlyǵy fermerlerdiń óndirisi men qyzmetiniń tıimdiligin qamtamasyz etýge baǵyttalǵan, – dedi komıtet tóraǵasy.
Aýyl sharýashylyǵy vıtse-mınıstri Azat Sultanov óz baıandamasynda Memleket basshysynyń aýyl sharýashylyǵy jalpy óniminiń kólemin 5 jylda 2 esege ulǵaıtý jónindegi tapsyrmasyn oryndaý maqsatymen mınıstrlik Jol kartasyn qabyldaǵanyn aıtty. Onyń aıasynda ár oblys ákimdigi úshin ártaraptandyrý, agrotehnologııalardy engizý jáne basqa da kishi salalar boıynsha kórsetkishter ázirlengen.
– Bıyl egis alqaptarynyń qurylymyn naqty ártaraptandyrý boıynsha barynsha sharalar qabyldandy. Bıdaı alqaby 450,3 myń gektarǵa qysqardy. Sýdy kóp qajet etetin daqyldardyń alańy – kúrish 6,9 myń ga, maqta 10 myń gektarǵa azaıdy. Al maıly daqyldar alańy 135,5 myń gektarǵa, qant qyzylshasy 9,4 myń gektarǵa ulǵaıtyldy, – dedi Aýyl sharýashylyǵy vıtse-mınıstri.
Azat Sultanovtyń aıtýynsha, 2028 jylǵa qaraı bıdaı alqaptary 855 myń gektarǵa qysqarýǵa tıis. Bul rette ónimdilikti arttyrý boıynsha qabyldanyp jatqan sharalardy eskere otyryp, jalpy bıdaı túsimi tómendemeıdi dep boljanyp otyr. Sonymen qatar osy kezeńde rentabeldiligi joǵary aýyl sharýashylyǵy daqyldarynyń alqaby: maıly daqyldar – 3,7 mln gektarǵa, mal azyǵy – 505 myń gektarǵa ulǵaıtylady.
Bul rette jańa egindi saqtaý máselesi ózekti kúıinde qalyp otyr. Vıtse-mınıstr respýblıkadaǵy astyq saqtaý qoımalarynyń jalpy syıymdylyǵy 30 mıllıon tonnany quraıtynyn, bul ótken jyldardaǵy tasymaldaý qaldyqtaryn esepke alǵanda josparlanǵan astyqty saqtaýǵa jetkilikti ekenin aıtty. Búgingi kúni jańa eginniń 2,5 mln tonnadan astamy nemese 48 paıyzǵa jýyǵy keptirilip, óńdelgen jáne qospalardan tazartylǵan. Mınıstrlik oblystardyń ákimdikterine kezekti boldyrmaý úshin astyqty qabyldaý jáne keptirý boıynsha elevatorlardyń toqtaýsyz táýlik boıy jumys isteýin qamtamasyz etýdi tapsyrdy.
Sonymen qatar otyrys barysynda eksport geografııasyn keńeıtý, ósimdik sharýashylyǵy ónimderin jetkizýge eksporttyq memleketaralyq kelisimsharttar jasaý jáne logıstıkany uıymdastyrý, kóktemgi egis jáne egin jınaý jumystaryna jeńildikpen nesıe berý, aınalym qarajatyn tolyqtyrý, aýyl sharýashylyǵy taýarlarynyń parkin sapaly jańartý máseleleri qaraldy.
Óz kezeginde agrobıznes ókilderi elevatorlardy shıkizatpen tolyq qamtamasyz etý, vagondardyń turaqty júrýi, paıyzdyq mólsherlemelerdi sýbsıdııalaýǵa jáne jańa kóktemgi egis kompanııasyn qarjylandyrýǵa qarajattyń jetispeýshiligi máseleleri talqylanyp, olardy sheshý joldary usynyldy.
Sóz sońynda Serik Egizbaev salalyq qaýymdastyqtar men bıznes ókilderiniń usynystaryn Azyq-túlik korporatsııasy men mınıstrlikter pysyqtaýy kerektigin aıtty. Komıtet tıisti usynymdar daıyndap, Úkimetke joldaıtyn bolady.
