Aýyl sharýashylyǵy alqaptaryn qorshaý úshin qandaı jeńildikter qarastyrylǵan
ORAL. KAZINFORM — Batys Qazaqstan oblysynda kıikterden qorǵaý úshin aýyl sharýashylyǵy alqaptaryn qorshaý máselesi kókeıkesti bolyp otyr. Osyǵan oraı qandaı jeńildikter qarastyrylǵan, bul jóninde BQO aýyl sharýashylyǵy basqarmasy basshysynyń orynbasary Rústem Zulqashev Kazinform tilshisine áńgimelep berdi.
R.Zulqashevtiń málim etkenindeı, QR Aýyl sharýashylyǵy mınıstriniń mindetin atqarýshynyń 2018 jylǵy 23 shildedegi № 317 buıryǵymen bekitilgen Agroónerkásiptik keshen sýbektisiniń ınvestıtsııalyq salymdar kezinde shekken shyǵyndarynyń bir bóligin óteý jónindegi sýbsıdııalaý qaǵıdalaryna sáıkes aýyl sharýashylyǵy taýaryn óndirýshilerdiń shyǵyndaryn óteýge baǵyttalǵan memlekettik qoldaý sharalary kózdelgen.
Onyń sózine qaraǵanda, 2025 jyldyń basynda atalǵan qaǵıdalarǵa kıikterdiń taptaýynan aýyl sharýashylyǵy alqaptaryn qorǵaýǵa arnalǵan topsaly torlar men baǵanalardy (metall jáne beton) sýbsıdııalaýǵa qatysty ózgerister engizilip, osy qorǵanysh qurylymdaryna qoıylatyn tıisti tehnıkalyq talaptar belgilendi.
Bul rette topsaly torlar men baǵanalardy sýbsıdııalaý olardyń qunynyń 50 paıyzy mólsherinde, biraq tordyń árbir qýma metri úshin 300 teńgeden jáne bir baǵana úshin 1 875 teńgeden aspaıtyn kólemde júzege asyrylatyny kózdelgen.
- Sonymen qatar bıylǵy 21 sáýirde qaǵıdalarǵa bastapqyda belgilengen talaptardy jeńildetýge baǵyttalǵan qosymsha ózgerister engizildi. Atap aıtqanda, qorǵanysh torynyń bıiktigine qoıylatyn talap 1,6 metrden 1,2 metrge deıin tómendetildi, sondaı-aq symnyń dıametri 2,5 mm-den 2,0 mm-ge deıin azaıtyldy, - deıdi R.Zulqashev.
Basqarma derekterine sáıkes oblys kóleminde 45 aýyl sharýashylyǵy taýaryn óndirýshiniń 34,4 myń gektar jeri topsaly tormen qorshalǵan. Bul kıikter men aýyl sharýashylyǵy janýarlarynyń egistik alqaptar men shabyndyqtardy taptaýynyń aldyn alý úshin asa qajet.
- Bul másele, ásirese, sońǵy jyldary oblystyń kıik jáne qýańshylyq zardabyn kóp tartqan ońtústik aýdandarynda ózekti bolyp tur. Atalǵan óńir sharýalary birtindep mal azyqtyq daqyldardy egýge bet burýda. Máselen, 2026 jyly Bókeı ordasynda 1,6 myń ga, Jańaqala aýdanynda 500 ga, Jánibekte 2,7 myń ga jáne Kaztalovta 900 ga mal azyqtyq daqyldar egildi. Kaztalov aýdanynda budan bólek 600 ga ótken jyldary egilgen kóp jyldyq shóp alqaptary bar. Degenmen bıyl búgingi kúnge deıin topsaly tor úshin sýbsıdııalardy alýǵa aýyl sharýashylyǵy taýaryn óndirýshilerden ótinimder túsken joq, - dep qosty basqarma basshysynyń orynbasary.
Eske sala keteıik, budan buryn Batys Qazaqstanda kıikterdiń egistikke túsip jatqany ras pa, sony jazǵan edik.
