«Aýyl» partııasynyń tóraǵasy saılaý qorytyndysyna baǵa berdi
ASTANA. KAZINFORM — «Aýyl» partııasynyń tóraǵasy Qaırat Aıtýǵanov saılaýdyń ashyq ári uıymdasqan túrde ótkenin atap ótti.
Ol Prezıdenttiń dáıekti saıası baǵyty men aýqymdy reformalary elimizdiń damýynda jańa kezeńge jol ashyp, azamattardyń qoǵamdyq-saıası úderisterge qatysýynyń mańyzyn arttyrǵanyn jáne qoǵammen ashyq dıalogty nyǵaıtqanyn alǵa tartty.
Kúni boıy partııa daýys berý barysyn baqylap, óńirlermen turaqty baılanysta boldy.
Qaırat Aıtýǵanovtyń aıtýynsha, saılaý tynysh, ashyq ári uıymdasqan jaǵdaıda, zańnama talaptaryna sáıkes ótti.
Qaırat Aıtýǵanov «Aýyl» partııasynyń nátıjesin halyqtyń senimi ári úlken jaýapkershilik dep baǵalady.
Sondaı-aq saılaýǵa qatysqan barsha qazaqstandyqtarǵa jáne partııaǵa qoldaý bildirgen azamattarǵa alǵysyn jetkizdi.
— Sizderdiń árbir daýystaryńyz — bizge budan da kóp ári jaýapkershilikpen jumys isteýge berilgen amanat. Saılaý aıaqtalady. Jumys jalǵasady, — dedi partııa tóraǵasy.
Saılaýdyń túpkilikti qorytyndysyn Qazaqstan Respýblıkasynyń Ortalyq saılaý komıssııasy shyǵarady.
Buǵan deıin «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
Sondaı-aq Respublica partııasy exit poll nátıjelerine qatysty pikir bildirdi.
