«Aýyl» partııasynyń tóraǵasy saılandy
ASTANA.KAZINFORM — «Aýyl» partııasynyń kezekten tys Sezi ótti. Sezd barysynda Serik Egizbaev «Aýyl» partııasynyń tóraǵasy qyzmetinen ketý týraly málimdedi.
Ol eń aldymen partııanyń jáne onyń bolashaǵynyń múddelerin basshylyqqa alatynyn atap ótti.
— Búgingi saıası sát barlyq progressıvti kúshterden qoǵamnyń jańarý týraly suranysyna laıyqty jaýap berýdi talap etedi. Bul suranys konstıtýtsııalyq reforma barysynda dáleldendi. «Aýyl» partııasy osy úderisterden shette qala almaıdy, kerisinshe, partııa olardyń belsendi qatysýshysy, al bul úshin agrarlyq jáne áleýmettik kún tártibine jańa kózqarastar ákelýdi, jańartylǵan saıası júıede tıimdi jumys isteýdi qajet etedi. Sondyqtan partııa tóraǵasy qyzmetimdi toqtatýym partııanyń ishki dınamıkaǵa daıyndyǵyn jáne jańa saıası júıede aldaǵy saılaýǵa tolyqqandy qatysýǵa nıettiligin kórsetetin zańdy qadam bolady. Sonymen qatar, men partııa maqsattaryna adalmyn jáne jańa tóraǵaǵa partııa qyzmetiniń sabaqtastyǵy men turaqtylyǵyn qamtamasyz etý úshin jan-jaqty qoldaý kórsetýge daıynmyn jáne partııa qatarynda belsendi qyzmet jasaımyn, — dedi Serik Egizbaev.
Serik Egizbaev Sezdiń qaraýyna partııa tóraǵasynyń orynbasary Qaırat Aıtýǵanovtyń kandıdatýrasyn partııanyń tóraǵasy laýazymyna usyndy.
Qaırat Qaparuly — agrarlyq ekonomıka, memlekettik qyzmet jáne ǵylymı salada 40 jyldan astam eńbek ótili bar joǵary bilikti basshy, ekonomıst jáne memleket qaıratkeri. Ár jyldary QR Aýyl sharýashylyǵy birinshi vıtse-mınıstri, apparat basshysy, sondaı-aq Halyqaralyq qaıta qurý jáne damý banki júzege asyrǵan jobanyń jetekshisi, «Ońtústik» áleýmettik-kásipkerlik korporatsııasy» ulttyq kompanııasy» AQ basqarma tóraǵasy, Qaraǵandy oblysy ákiminiń orynbasary, «QazAgro» ulttyq basqarýshy holdıngi» AQ basqarma tóraǵasynyń orynbasary, «QR Kásipodaqtar federatsııasy» respýblıkalyq qoǵamdyq birlestiginiń tóraǵa orynbasary. Sonymen qatar, «Ulttyq agrarlyq ǵylymı-bilim berý ortalyǵy» KEAQ dırektorlar keńesiniń tóraǵasy, sondaı-aq S. Seıfýllın atyndaǵy Qazaq agrotehnıkalyq ýnıversıtetiniń basqarma tóraǵasy qyzmetterin atqarǵan.
Partııa tóraǵasynyń orynbasary ol retinde aýyldyq aýmaqtardy damytýǵa baǵyttalǵan zańnamalyq jáne baǵdarlamalyq bastamalardy ázirleý men ilgeriletýge belsene qatysty.
Qaırat Qaparuly kásibı ortada joǵary bedelge ıe, eldiń qoǵamdyq-saıası ómirine belsendi qatysady jáne agrarlyq saladaǵy tıimdi memlekettik saıasatty qalyptastyrýǵa zor úles qosýda.
Serik Egizbaevtyń aıtýynsha, jańa tóraǵanyń partııalyq jumysta sabaqtastyqty qamtamasyz etip, alda turǵan mindetterdi iske asyrýdy úılestirýge zor múmkindigi bar.
Sezd delegattary Qaırat Aıtýǵanovtyń «Aýyl» partııasynyń jańa tóraǵasy bolyp saılanýyn biraýyzdan qoldady.
Sonymen qatar Sezd jańa Konstıtýtsııaǵa sáıkes partııa Jarǵysyna tolyqtyrýlar men ózgerister engizý týraly sheshim qabyldady.
