«Aýyl» partııasynyń tóraǵasy nege aýysty

«Aýyl» HDPP tóraǵasy, Májilis depýtaty, fraktsııa jetekshisi Serik Egizbaev Jibek Joly telearnasynyń «Ýáde» baǵdarlamasyna suhbat berip, partııa basshylyǵyndaǵy aýys-túıiske túsinik berdi, dep habarlaıdy Kazinform. 

Suhbat barysynda «Álı Bektaev (senator) partııa tóraǵasy qyzmetin ne sebepti tapsyrǵany» jóninde suraq qoıyldy.

Óz kezeginde S. Egizbaev bıyl qazan aıynan bastap «Aýyl» HDPP tóraǵasy bolyp saılanǵanyn eske saldy.

«Álı Ábdikárimuly partııany 8 jyl basqardy. Qazir ol kisi — Senattyń agrarlyq máseleler, tabıǵat paıdalaný jáne aýyldyq aýmaqtardy damytý komıtetiniń tóraǵasy. Osy oraıda Senatta kóp jumys atqaryp júr. Atap aıtqanda, Álı Bektaev partııanyń qıyn kezeńinde, ońaı emes jyldarynda tóraǵalyq etti», — dedi Serik Egizbaev.

Ol 18 qazanda «Aýyl» halyqtyq-demokratııalyq patrıottyq partııasynyń kezekten tys XXIII sezi ótip, oǵan partııanyń barlyq jıyrma óńirlik fılıalynan delegattar qatysqanyn aıtty.

«Osy sezde bul máseleni talqyladyq. Álı Ábdikárimuly elge tanymal saıasatker ekeni belgili. Partııany 8 jyl basqaryp, birneshe saıası naýqandardan ótkizip, sondaı-aq partııany Májiliske jetkizip baryp, tóraǵalyqty tapsyrý kerek degen sheshim jasady dep oılaımyn», — dedi Májilis depýtaty, fraktsııa jetekshisi.

Aıta keteıik, «Aýyl» partııasy bıylǵy saılaý qorytyndysy boıynsha Parlament Májilisinde 8 depýtattyq mandatqa ıe boldy.

Eske salsaq, bıyl qazan aıynda partııanyń burynǵy tóraǵasy Á. Bektaev Parlament Májilisindegi «Aýyl» saıası fraktsııasy partııanyń saılaýaldy baǵdarlamasyn iske asyrý, sondaı-aq Memleket basshysynyń depýtattar aldyna qoıǵan mindetterin oryndaý jónindegi jumysyn jandandyrýy qajet ekenin aıtty.

«Osyny eskere otyryp, Májilistiń saılanǵan depýtattary arasynan partııanyń jańa kóshbasshysy bolýy tıis dep sanaımyn», — dedi Álı Bektaev.  

Al ózi QR Parlamenti Senatyndaǵy jumysyna negizgi kóńil bóletinin jetkizdi.