«Aýyl» partııasynyń ókilderi Prezıdent tapsyrmalaryn túsindirýge kiristi
ASTANA. KAZINFORM - «Aýyl» partııasy aýyl sharýashylyǵy qyzmetkerleriniń Ekinshi forýmynda berilgen Prezıdenttiń tapsyrmalaryn keńinen túsindirý jumysyna kiristi, dep habarlaıdy partııanyń baspasóz qyzmeti.
Ótken aptada Qazaqstan Respýblıkasynyń Prezıdenti Qasym-Jomart Toqaevtyń qatysýymen aýyl sharýashylyǵy qyzmetkerleriniń Ekinshi forýmy ótti. Memleket basshysy óńirlerdiń damýyna aıryqsha nazar aýdaryp, aýyldyń ulttyq ekonomıkanyń ósý núktesi ekenin atap ótti: «Túptep kelgende, aýyl sharýashylyǵyn damytý máselesine jalpy aýyl-aımaqtardy, ıaǵnı búkil eldi damytý dep qaraǵan jón».
Memleket basshysy óńirlerdiń damýy agroónerkásiptik keshenniń tikeleı fýnktsııasy ekenin erekshe atap ótti.
Onyń aıtýynsha, APK-niń damýy aýyldyq aýmaqtardyń nyǵaıýyna, al bul óz kezeginde óńirler men jalpy eldiń ósýine yqpal etedi.
Forým ótkizilgennen keıin dereý «Aýyl» partııasy Memleket basshysy qoıǵan mindetter men bastamalardy túsindirýge baǵyttalǵan birqatar is-sharalardy uıymdastyrdy.
Atap aıtqanda, «Aýyl» partııasy delegatsııasy, partııa tóraǵasy, QR Parlamenti Májilis depýtaty, Agrarlyq máseleler komıtetiniń tóraǵasy Serik Egizbaevtyń basshylyǵymen Syrdarııa aýdanynyń Besaryq aýylyna baryp, jergilikti aýyl sharýashylyǵy kooperatıviniń jáne fermerlik sharýashylyqtardyń jumysymen tanysty.
Sondaı-aq, sharýalar men agroónerkásiptik sala qyzmetkerlerimen kezdesýler ótkizildi. Kezdesýler barysynda ol Prezıdenttiń aýyl turǵyndarynyń tabysyn arttyrýǵa, mal sharýashylyǵyn qoldaýdy keńeıtýge jáne AÓK-ti jańǵyrtýǵa baǵyttalǵan negizgi ıdeıalary men bastamalaryn jan-jaqty túsindirdi.
Sonymen qatar, partııa tóraǵasy Qyzylorda oblystyq fılıalynyń aktıvimen kezdesti.
Kezdesý barysynda aımaqtyq deńgeıde Prezıdent tapsyrmalaryn júzege asyrý mehanızmderi, sondaı-aq «Aýyl» partııasynyń Prezıdent qoıǵan mindetterdi iske asyrýdaǵy róli men orny talqylandy. Kezdesý aıasynda partııanyń eń belsendi músheleri vedomstvolyq nagradalarmen jáne «Aýyl» partııasynyń mereıtoılyq medaldarymen marapattaldy.
Sapar barysynda Serik Egizbaev «Qaısar» voleıbol jáne gandbol komandasynyń oıynshylarymen de kezdesti. Sportshylar aýyl aımaqtaryn damytý strategııasyn qoldaıtynyn bildirip, «Aýyl» partııasyna qosylý sheshimin qabyldady. Saltanatty jaǵdaıda olarǵa partııalyq bıletter tabystaldy.