«Aýyl» partııasy jyldy qorytyndylady
ASTANA. KAZINFORM — 22 jeltoqsanda Astanada QR Parlamenti Májilisiniń depýtaty, Agrarlyq máseleler komıtetiniń tóraǵasy jáne «Aýyl» partııasynyń tóraǵasy Serik Egizbaevtyń jetekshiligimen partııa qurylymdarynyń 2025 jylǵy qyzmetin qorytyndylaýǵa arnalǵan eseptik semınar-keńes ótti.
Partııa baspasóz qyzmetiniń málimetine sáıkes, is-sharaǵa Májilistegi «Aýyl» fraktsııasynyń depýtattary, 20 óńirlik fılıaldyń basshylyǵy men partııa belsendileri qatysty.
— Ótip bara jatqan jyl bizdiń partııa úshin eń jemisti jyldardyń biri boldy. Bizdiń kúsh-jigerimizdiń arqasynda myńdaǵan is-shara júzege asyryldy. Osy jumystyń nátıjesinde azamattardyń partııaǵa degen senimi artyp, nıettes jandardyń qatary kóbeıdi. Bul — qarapaıym halyqtyń shynaıy rızashylyǵynyń kórinisi, — dep atap ótti «Aýyl» partııasynyń tóraǵasy Serik Egizbaev.
Semınar-keńes barysynda esepti kezeńdegi partııanyń saıası jáne uıymdastyrýshylyq qyzmetine keshendi taldaý jasaldy. Óńirlik qurylymdar jumysynyń tıimdiligi, depýtattyq korpýstyń bastamalary, azamattarmen keri baılanys ornatý tetikteri, sondaı-aq partııalyq jobalardyń iske asyrylý barysy jan-jaqty qaraldy.
Keńes aıasynda «Aýyl» partııasy men Jumabek Janyqulov tóraǵalyq etetin «PARYZ» jumys berýshiler ulttyq konfederatsııasy arasynda strategııalyq yntymaqtastyq memorandýmyna qol qoıý rásimi ótti. Bul kelisim otandyq kásipkerlikti qoldaý jáne shaǵyn jáne orta bıznesti (ShOB) damytý úshin praktıkalyq platforma qalyptastyrady. Taraptar eńbek qatynastaryn nyǵaıtý, bıznestiń áleýmettik jaýapkershiligin arttyrý jáne aýyldyq jerlerde jańa jumys oryndaryn ashý jolynda kúsh biriktiredi, bul — qazaqstandyq aýyldy damytýdyń basty basymdyǵy.
Partııanyń damýyna jáne qoǵamdyq-saıası turaqtylyqty nyǵaıtýǵa eleýli úles qosqan azamattardy marapattaý sharanyń erekshe saltanatty sátine aınaldy.
Kópjyldyq adal eńbegi men belsendi azamattyq ustanymy úshin kelesi azamattarǵa mereıtoılyq marapattar berildi:
- Turmuhambetova Anar Aqylbekqyzy — «Astana medıtsına ýnıversıteti» KEAQ Basqarma tóraǵasy, rektory;
- Muqatov Qajǵalı Sıpýlovıch — General-maıor, Qazaqstan Respýblıkasy Qarýly Kúshteriniń ardageri;
- Asanov Baýrjan Konırbaevıch — «Ulttyq agrarlyq ǵylymı-bilim berý ortalyǵy» KEAQ Basqarma tóraǵasy;
- Qanybekov Sáken Ásembekuly — QR Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń tóraǵasy;
- Ábdirahmanova Sanııa Álıshqyzy — QR Densaýlyq saqtaý mınıstrligi Transfýzıologııa ǵylymı-óndiristik ortalyǵynyń Basqarma tóraǵasy jáne basqalar.
Jıyn barysynda partııa tóraǵasynyń orynbasarlary ózderi jetekshilik etetin árbir baǵyt boıynsha atqarylǵan jumystardyń nátıjeleri týraly baıandama jasady. Spıkerler 2025 jylǵy partııalyq jobalardyń naqty kórsetkishterin saralap, Ortalyq apparat pen óńirlik qurylymdardyń ózara is-qımylyn kúsheıtý boıynsha usynystaryn jetkizdi.
Semınar-keńes qorytyndysy boıynsha partııanyń kelesi jylǵa arnalǵan saıası strategııasyn aıqyndaıtyn birqatar usynym qabyldanyp, óńirlerge naqty tapsyrmalar júkteldi. Qabyldanǵan sheshimder partııa qyzmetiniń tıimdiligin arttyrýǵa, halyqpen ózara is-qımyl sapasyn jaqsartýǵa jáne jalpyulttyq basymdyqtardy iske asyrýdaǵy «Aýyl» partııasynyń jaýapkershiligin odan ári nyǵaıtýǵa baǵyttalǵan.