«Aýyl» partııasy jasandy ıntellektimen jumys isteıtin platforma ázirlep jatyr

ASTANA. KAZINFORM – «Aýyl» partııasy jańa tsıfrlyq sheshimderdi engizip, ishki protsesterdi avtomattandyrýǵa kóńil bólip otyr. Bul týraly «Aýyl» partııasynyń tóraǵasy, Májilistegi agrarlyq máseleler komıtetiniń tóraǵasy Serik Egizbaev aıtty.

− Búginde partııa tolyq jańǵyrý baǵytyn ustanyp otyr. Partııa qyzmetin uıymdastyrýdaǵy basty baǵyt – jańa tsıfrlyq sheshimderdi engizý jáne ishki protsesterdi avtomattandyrý bolyp otyr. Qazir e-party elektrondy platformasy ázirlenip, memlekettik derekqorlarmen ıntegratsııalanyp jatyr. Bul jaı ǵana qural emes, jasandy ıntellekt elementteri bar tolyqqandy tsıfrlyq júıe. Ol partııa ishinde de, azamattyq qoǵammen de ózara árekettesýdiń ashyqtyǵyn, qoljetimdiligin jáne jedeldigin qamtamasyz etedi, − dedi S. Egizbaev «Aýyl» partııasynyń 25 jyldyǵyna arnalǵan ǵylymı-praktıkalyq konferentsııada.

Partııa tóraǵasy áleýmettik jelilerdegi jumysqa kóńil bólinip, kontent daıyndaý, onlaın qaýymdastyq qalyptastyrý jumystary júrip jatqanyn aıtty.

− Biz partııaǵa qabyldaý formatyn qaıta qarap jatyrmyz, ony barynsha yńǵaıly, jyldam jáne ashyq etýge tyrysamyz. Ótinish berý, verıfıkatsııa jáne jańa múshelerdi biriktirý úshin avtomattandyrylǵan júıe ázirlenip jatyr. Bıyl aqpan aıynda sotsıologııalyq ınstıtýttar júrgizgen zertteý nátıjeleri boıynsha, partııamyzdyń tanymaldyq deńgeıi 40% qurady. Bul árbir partııa múshesiniń áleýeti men tıimdiligin kórsetetin nátıje. Alaıda biz azamattardyń senimin nyǵaıtý jáne partııanyń ustanymdaryn kúsheıtý baǵytyndaǵy jumysymyzdy ári qaraı jandandyrýymyz qajet, − dedi depýtat.

Buǵan deıin S. Egizbaev Qazaqstan kartasynan 1,5 myńnan astam aýyl joıylyp ketkenin, qazir aýylda halyqtyń 37%-y qalǵanyn aıtqan edi.