«Aýyl» partııasy jańa Konstıtýtsııa jobasyna tolyq qoldaý bildirdi
ASTANA. KAZINFORM — Konstıtýtsııalyq reforma aıasynda memlekettiń irgeli qaǵıdattary nyǵaıtyldy. Bul týraly búgin Májilistiń jalpy otyrysynda Jańa Konstıtýtsııa jobasyn talqylaý kezinde depýtat Erbolat Saýryqov málim etti.
— Bizdiń partııa ókilderi buqaralyq aqparat quraldary men qoǵamdyq alańdarda túsindirý jumystaryn belsendi túrde júrgizip jatqanyna qaramastan, partııa ishinde jańa Konstıtýtsııa jobasyn qosymsha talqylaýdy qajet dep eseptedik. Máselen, bıylǵy 2 aqpanda bul másele fraktsııa otyrysynda, al keshe barlyq óńirlik fılıal men partııa aktıviniń qatysýymen ótken partııanyń Saıası keńesiniń keńeıtilgen otyrysynda qaralǵan. Osy talqylaý barysynda Konstıtýtsııa jobasy egjeı-tegjeıli qaralyp, jan-jaqty talqylandy. Ótkizilgen keńesterdiń qorytyndysy boıynsha «Aýyl» partııasy jańa Konstıtýtsııa jobasyna tolyq ári biraýyzdan qoldaý bildirdi. Búgin men bul ustanym men qoldaýdy QR Parlamenti Májilisiniń nazaryna resmı túrde jetkizgim keledi, — dedi Erbolat Saýryqov.
Osy oraıda depýtat bir jaǵynan qoǵamda taralyp jatqan dáıeksiz aqparatqa qatysty túsindirýdi talap etetin, al ekinshi jaǵynan jańa Konstıtýtsııa jobasynda belgilengen strategııalyq baǵdarlardy kórsetetin negizgi máselege toqtaldy.
— Birinshi másele — jerdi sheteldikterge satý týraly jalǵan aqparat. Qoǵamdyq jáne aqparattyq keńistikte jerdi sheteldikterge satýǵa tyıym salýdy joıý týraly eski ári qoǵam úshin túıtkildi taqyryp qaıta kóterildi. Áleýmettik jelilerde jańa Konstıtýtsııa jobasynan bul tyıym «bildirtpeı» alynyp tastaldy degen pikirler keńinen taralyp jatyr. Bul aqparattyń jalǵan ári shyndyqqa saı kelmeıtinin búkil jaýapkershiligimmen atap ótkim keledi. Jerge, jer qoınaýyna, sýǵa, ósimdikter men janýarlar dúnıesine qatysty negizgi tujyrymdar Jańa Konstıtýtsııa jobasynda ózgerissiz qalǵan. Sonymen qatar, konstıtýtsııalyq reforma aıasynda memlekettiń irgeli qaǵıdattary álsiregen joq, kerisinshe nyǵaıtyldy. Eldiń tutastyǵy men ýnıtarlyǵyna qatysty erejeler Konstıtýtsııanyń eń bastapqy bólimderinde aıqyn kórinis taýyp, olarǵa erekshe quqyqtyq mán berilip otyr. Bul — memlekettiń aýmaqtyq tutastyǵy men egemendigine degen berik ustanymnyń belgisi. Jańa Konstıtýtsııa jobasy Qazaqstannyń búkil aýmaǵy bólinbeıtin, qol suǵylmaıtyn jáne memleket qorǵaýyndaǵy birtutas keńistik ekenin naqtylaıdy. Memlekettiń táýelsizdigi, ýnıtarlyǵy men aýmaqtyq tutastyǵy ózgermeıtin qundylyqtar retinde aıqyn bekitilgen, — dedi Erbolat Saýryqov.
Budan buryn habarlanǵandaı, búgin Májilis Jańa Konstıtýtsııa jobasyn talqylaıtynyn jazǵan edik.