«Aýyl» partııasy jańa Konstıtýtsııa jobasyn referendýmǵa shyǵarýdy usyndy

ASTANA. KAZINFORM — Májilis depýtaty, «Aýyl» partııasynyń tóraǵasy Serik Egizbaev partııalastary atynan qazaqstandyqtardy jańa Konstıtýtsııanyń jobasyn qoldaýǵa shaqyrdy.

— «Aýyl» partııasy respýblıka aımaqtarynda Konstıtýtsııa jobasyn túsindirý baǵytynda aýqymdy qoǵamdyq talqylaý jumystaryn uıymdastyrdy. Atap aıtsaq, Qaraǵandy, Qyzylorda, Soltústik Qazaqstan, Qostanaı, Kókshetaý, Shymkent óńirlerinde, basqa da aımaqtarda halyqpen kóptegen kezdesý ótkizdi, ótkizilip te jatyr. Osy turǵydan alǵanda «Aýyl» partııasy usynǵan qoǵam úshin mańyzdy sanalatyn birqatar baǵyttyń, sonyń ishinde qazirgi jáne keler urpaqtyń densaýlyǵy men ómirine asa mańyzdy ekologııa, qorshaǵan ortany qorǵaý jáne tabıǵı resýrstarǵa jaýapkershilikpen qaraý qaǵıdattarynyń Konstıtýtsııa jobasynda kórinis tabýy birlesip júrgizgen jumystardyń naqty nátıjesi dep bilemin, — dedi ol Konstıtýtsııalyq reforma jónindegi komıssııanyń búgingi otyrysynda.

Aıtýynsha, aýyl halqy Konstıtýtsııa jobasyndaǵy jańashyldyqtardy túsiniktikpen qabyldap otyr.

— Talqylaý barysynda aýyl turǵyndary bul ózgeristerdi tek quqyqtyq normalar emes, kúndelikti ómirge tikeleı áser etetin naqty tetikter retinde qabyldap otyr. Osy oraıda mańyzdy bir jaıtty aıtqym keledi. Kezdesýlerde barlyq azamattar biraýyzdan bul qujatty halyqtyń sheshimimen bekitetin ýaqyt jetti degen pikirdi jıi aıtty. Sondyqtan Konstıtýtsııa jobasyn jalpyulttyq referendýmǵa shyǵarýdy usynamyz. Barlyq otandastarymyzdy jańa Konstıtýtsııamyzdy qoldaýǵa shaqyramyn, — dedi Serik Egizbaev.

Aıta keteıik, Kazinform agenttiginiń Telegram arnasynda osy otyrystyń mátin translıatsııasy berilip jatyr.