«Aýyl» partııasy Quryltaıdaǵy 10 depýtatynyń tizimin bekitti

Sheshim 23 tamyzda ótken Quryltaı saılaýynyń qorytyndysy boıynsha qabyldandy. Saılaý nátıjesinde «Aýyl» partııasy 10 depýtattyq mandatqa ıe boldy.

Partııa Jarǵysyna sáıkes Saıası keńes Bıýrosy alqaly túrde myna kandıdattardyń tizimin bekitti:

1.Aıtýǵanov Qaırat Qaparuly
2.Baımanov Shahmardan Asqaruly
3.Begalıeva Zahıra Ońǵarbaıqyzy
4.Egizbaev Serik Rahmetollauly
5.Irgıbaev Murat Samatuly
6.Kadjıbekova Ajar Elemesqyzy
7. Kııan Vladımır Sergeevıch
8. Muhametov Almas Erekuly
9. Raıhanova Dınara Qýanyshqyzy
10. Toqseıtova Rabıǵa Álibekqyzy

Tıisti qujattar zańnamada belgilengen tártippen tirkeý úshin Qazaqstan Respýblıkasynyń Ortalyq saılaý komıssııasyna joldandy. Depýtattyq mandattardy bólý kezinde áıelderdiń, jastardyń jáne múgedektigi bar adamdardyń ókildigine qatysty zań talaptary saqtaldy. Olardyń bekitilgen quramdaǵy jıyntyq úlesi — 60%.

Tizim kandıdattardyń kásibı biliktiligi men quzyretteri eskerile otyryp jasaqtaldy jáne sapaly ári teńgerimdi quramymen erekshelenedi. Onyń quramynda agrarlyq sektor, memlekettik basqarý, ǵylym, bıznes jáne áleýmettik salanyń ókilderi bar.

Atap aıtqanda, jańa quramǵa agronomdar, veterınarııa mamandary, ǵalymdar, bıotehnologııa salasynyń sarapshylary, sondaı-aq memlekettik basqarý, áleýmettik saıasat jáne ınklıýzııa salasynyń mamandary endi. Jańa fraktsııanyń basty mindeti — partııanyń saılaýaldy baǵdarlamasyn naqty júzege asyrý. Depýtattar óńirlerdi damytý, azyq-túlik qaýipsizdigi, ınfraqurylym, áleýmettik saıasat, bilim men ǵylym, otbasy men jastardy qoldaý jáne ekologııa baǵyttaryndaǵy bastamalardy ilgeriletýge kúsh salady. Sonymen qatar partııa quramdy jańartý jáne kadrlyq áleýetti kúsheıtý jumysyn jalǵastyrady.

Bekitilgen tizimge enbegen kandıdattar arasynan partııalyq kadrlyq rezerv qalyptastyrylyp, olar saraptamalyq, qoǵamdyq jáne uıymdastyrýshylyq jumystarǵa tartylady. «Aýyl» partııasynyń basty maqsaty — saılaýshylardyń senimin aqtap, saılaýaldy baǵdarlamany naqty ister arqyly júzege asyrý.