«Aýyl» partııasy Quryltaı saılaýyna qatysatyn 69 kandıdatty bekitti
ASTANA. KAZINFORM — Astanada ótken «Aýyl» partııasynyń kezekten tys XXVI sezinde Quryltaı depýtattaryn saılaýǵa qatysatyn úmitkerlerdiń partııalyq tizimi men saılaýaldy baǵdarlamasy bekitildi.
Atalǵan tizimge barlyǵy 69 kandıdat engizildi. Olardyń 71 paıyzy — erler, 29 paıyzy — áıelder. Úmitkerlerdiń ortasha jasy — 46.
«Aýyl» partııasy tóraǵasynyń birinshi orynbasary Serik Egizbaevtyń aıtýynsha, partııanyń saılaýaldy baǵdarlamasy 4 negizgi bólimnen turady. Qujatta Májilistegi partııa fraktsııasynyń atqarǵan jumysynyń nátıjeleri men óńirlerdi damytýdyń 7 basym baǵyty qamtyldy. Olardyń qatarynda azyq-túlik qaýipsizdigin qamtamasyz etý, ınfraqurylymdy damytý, áleýmettik saıasat, bilim men ǵylym, ekologııa, sondaı-aq dástúrli otbasylyq qundylyqtardy saqtaý máseleleri bar.
— Eldiń ál-aýqaty joǵarydaǵy kabınetterden emes, óńirlerden bastalady. Sondyqtan bizdiń basty saılaýaldy ustanymymyz — «Qýatty óńir — qýatty ortalyq! — dedi Serik Egizbaev.
Sezd barysynda partııanyń Saıası keńesiniń jańa quramy da bekitildi. Onyń quramy 29 adamnan turady.
Kezekten tys sezge elimizdiń barlyq 20 óńirinen kelgen 200 adam qatysty. Olardyń qatarynda «Aýyl» partııasynan saılanǵan barlyq deńgeıdegi máslıhat depýtattary, óńirlik fılıaldardyń konferentsııalarynda tańdalǵan delegattar, Saıası keńes músheleri, partııa ardagerleri, jastar ókilderi jáne shaqyrylǵan qonaqtar boldy.
Aıta keteıik, «Aq jol» partııasy 63 kandıdattan turatyn partııalyq tizimdi bekitkenin jazǵan edik.
