«Aýyl» partııasy Konstıtýtsııalyq reformany elimizdiń damý baǵytyn aıqyndaıtyn tarıhı qadam dep baǵalady

ASTANA. KAZINFORM — Búgin elordada «Aýyl» partııasy Saıası keńesiniń keńeıtilgen otyrysy ótti. 

Jıyn barysynda partııa músheleri, Parlament depýtattary men qoǵam belsendileri Konstıtýtsııanyń jańa jobasyn talqylap, elimizdiń saıası jańǵyrý jolyndaǵy tarıhı qadam retinde biraýyzdan qoldaý bildirdi.

Jıyndy ashqan partııa tóraǵasy, Konstıtýtsııalyq reforma jónindegi komıssııanyń múshesi Serik Egizbaev baıandama jasady. Ol jańa Konstıtýtsııany el damýynyń jańa fılosofııasy jáne «Ádiletti Qazaqstannyń» quqyqtyq irgetasy dep atady.

— Bul qujat — Memleket basshysy Qasym-Jomart Toqaev usynǵan saıası reformalardyń zańdy jalǵasy. Jańa bir palataly Parlament — Quryltaıdyń qurylýy partııalyq júıeni jandandyryp, aýyl eńbekkerleriniń múddesin jańa deńgeıde qorǵaýǵa jol ashady. Biz úshin basty baılyq — tabıǵı resýrs emes, bilimdi, adal ári básekege qabiletti azamat, — dep atap ótti S. Egizbaev.

Otyrys barysynda kún tártibine sáıkes saıası reformanyń negizgi baǵyttary boıynsha jaryssózder júrgizilip, spıkerler óz tujyrymdaryn ortaǵa saldy. Parlament Májilisiniń depýtaty Jıgýlı Daırabaev 145 depýtattan turatyn Quryltaıdyń tarıhı mańyzyna toqtaldy.

Onyń aıtýynsha, bir palataly model bıýrokratııalyq kedergilerdi joıyp, bılik tetikteriniń ashyqtyǵy men tıimdiligin arttyrady.

Partııa ardageri Mynaýtaýbıik Ánesov Ata zańda tarıhı-mádenı murany saqtaý men «Din memleketten bólek» qaǵıdatynyń naqtylanýyn joǵary baǵalady.

— Bul normalar ulttyq qundylyqtardy qorǵaýdyń quqyqtyq kepili bolmaq, — dedi ol óz sózinde.

Túrkistan oblystyq fılıalynyń ókili, oblystyq máslıhat depýtaty Nurjan Ájimetov proportsıonaldy saılaý júıesi partııalyq jaýapkershilikti arttyratynyn, al vıtse-prezıdent laýazymy memlekettik basqarýdyń sabaqtastyǵyn qamtamasyz etetinin jetkizdi.

Saıası keńes múshesi, Soltústik Qazaqstan oblystyq máslıhat depýtaty Olga Klıshına zań shyǵarý bastamasyna ıe bolatyn Halyq keńesiniń rólin erekshe atady. Ol bul ınstıtýtty bılik pen qoǵam arasyndaǵy, ásirese aýyl turǵyndary úshin tıimdi «altyn kópir» dep sıpattady.

Qyzylorda oblystyq fılıalynyń tóraǵasy, oblystyq máslıhat depýtaty Sadyq Mustafa reformanyń halyqtyq sıpatyna toqtaldy. Ol Prezıdenttiń Konstıtýtsııalyq reformany jalpyhalyqtyq referendým arqyly júzege asyrý týraly bastamasyn demokratııanyń eń joǵarǵy kórinisi dep atady.

— Konstıtýtsııanyń jańa redaktsııasynda bıliktiń birden-bir bastaýy halyq ekeni naqty bekitiledi. Referendým arqyly árbir azamat memleket taǵdyryna tikeleı yqpal etetin belsendi qatysýshyǵa aınalady. Bul — bılik pen halyq arasyndaǵy senimdi nyǵaıtatyn ádiletti jol, — dedi ol.

Qostanaı oblystyq fılıalynyń ókili, oblystyq máslıhat depýtaty Dınara Ahmetova áıelder men jastarǵa arnalǵan 30 paıyzdyq kvotanyń saqtalýynyń mańyzdylyǵyn atap ótip, muny aýyl lıderleri úshin naqty «áleýmettik lıft» dep baǵalady.

Jıyn sońynda «Aýyl» partııasy Saıası keńesiniń músheleri Qazaqstan halqy men partııalastarǵa usynylǵan Konstıtýtsııa jobasyn muqııat zerdeleýge, ony jan-jaqty túsindirý jumystaryn jandandyrýǵa jáne shyndyqqa janaspaıtyn arandatýshylyq jarııalanymdardyń jeteginde ketpeýge shaqyratyn Úndeý qabyldady.