Aýyl oqýshylaryna Astana pedagogteri onlaın sabaq beredi
ASTANA. KAZINFORM — 1 qyrkúıekten bastap Qazaqstanda aýyldyq shaǵyn jınaqty mektepterdiń bilim berý protsesine jasandy ıntellektti engizý boıynsha pılottyq joba iske qosyldy. Jobanyń alǵashqy qatysýshylary Pavlodar jáne Qyzylorda oblystaryndaǵy 10 mektep boldy.
Jobanyń iske qosylýy Memleket basshysynyń tapsyrmalaryn oryndaý aıasynda júzege asyryldy. Mamyr aıynda Prezıdent Qasym-Jomart Toqaev orta bilim berý júıesine jasandy ıntellektti engizý jónindegi sharalar týraly arnaıy Jarlyqqa qol qoıǵan bolatyn.
Alǵashqy sabaqty Qazaqstan Respýblıkasy Premer-mınıstriniń orynbasary — Jasandy ıntellekt jáne tsıfrlyq damý mınıstriniń m. a. Jaslan Mádıev ashty.
— Búgin sizder elimizde alǵashqylar bolyp ulttyq bilim berý jasandy ıntellekt platformasynyń kómegimen oqýdy bastap otyrsyzdar. Bul — úlken múmkindik. Alaıda bilim alýdaǵy eń bastysy — sizderdiń bilýge degen qushtarlyqtaryńyz, eńbekterińiz jáne jańa nárseni úırenýge degen yntalaryńyz. Oqýshylar men ustazdarǵa sáttilik tileımin. Alda sizderdi kóptegen qyzyqty jańalyqtar kútip turǵanyna senimdimin, — dedi Jaslan Mádıev.
Aýyl mektepteriniń oqýshylaryna sabaqtardy Astana qalasynyń jetekshi pedagogteri ótkizedi. Ol úshin «Órleý» biliktilikti arttyrý ulttyq ortalyǵynyń bazasynda arnaıy stýdııa jabdyqtalǵan. Muǵalim sabaqty tikeleı efırde ótkizip, aýyl mektepteriniń oqýshylary oǵan tsıfrlyq platforma arqyly qosylady. Mektepterde oqýshylarǵa onlaın jáne oflaın oqytýdy úılestire júrgizetin jergilikti pedagogter kómektesedi.
Platforma tikeleı oqytýdy, zamanaýı bilim berý kontentin jáne jasandy ıntellekt quraldaryn biriktiredi. Bul format aýyl mektepteri oqýshylarynyń bilikti pedagogterdiń sabaqtaryna qoljetimdiligin arttyryp, qala mektepteri men shaǵyn jınaqty aýyl mektepteri arasyndaǵy bilim sapasyndaǵy aıyrmashylyqty azaıtýǵa múmkindik beredi.
Pılottyq jobany ázirleý barysynda jasandy ıntellekt salasyndaǵy álemdegi jetekshi sarapshylardyń biri, doktor Kaı-Fý Lıdiń usynymdary eskerildi.
21-25 tamyz aralyǵynda Astanada pedagogterge arnalǵan bes kúndik ALFA Kazakhstan Teacher Training Camp trenıngi ótkizildi. Muǵalimder jasandy ıntellekt platformasymen jumys isteý jáne birlesken oqytý modeli boıynsha daıyndyqtan ótti.
Joba Oqý-aǵartý mınıstrligi, Q.AI jáne 01.AI kompanııalarymen birlesip júzege asyrylyp otyr. Pılottyq jobanyń qorytyndysy boıynsha platforma oqytý nátıjeleri men pedagogter men oqýshylardyń keri baılanysy negizinde jetildiriletin bolady. Aldaǵy ýaqytta jobany elimizdiń basqa da óńirleri men mektepterine keńeıtý josparlanyp otyr.
Aıta ketelik bıyl elimiz boıynsha 4 mıllıonnan astam oqýshy dástúrge saı alǵashqy qońyraý syńǵyryn estıdi. Al 380 myńnan astam bala alǵash ret mektep tabyldyryǵyn attamaq.
