Aýyl oqýshylary endi JI kómegimen bilim alady: joba 2,6 myń mektepti qamtıdy
ASTANA. KAZINFORM — Elimizde bıylǵy 1 qyrkúıekten bastap shaǵyn jınaqty mektepterge jasandy ıntellektini engizý boıynsha pılottyq joba iske qosyldy. Bul týraly Úkimettiń baspasóz qyzmeti málim etti.
2028 jylǵy shildege deıin elimizdegi 2,6 myńnan astam shaǵyn jınaqty aýyl mektebi jasandy ıntellekt engizý jobasymen qamtylmaq. Qazirgi tańda pılottyq joba Pavlodar jáne Qyzylorda oblystaryndaǵy mektepterde júzege asyrylyp jatyr. Bul Prezıdent Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda bilim alýshylardyń mektep qabyrǵasynan bastap jasandy ıntellekt salasyndaǵy quzyretterin damytýǵa qatysty bergen tapsyrmalaryna sáıkes júzege asyrylmaq.
Pılottyq joba Pavlodar jáne Qyzylorda oblystarynda ornalasqan elimizdiń alǵashqy 10 mektebin qamtıdy. Joba sheńberinde 4-synypta oqıtyn 50-den astam oqýshy matematıka, tsıfrlyq saýattylyq, qazaq tili jáne orys tili pánderi boıynsha oqytý uıymdastyryldy. Atalǵan joba — 2026–2029 jyldarǵa arnalǵan orta bilim berý júıesine jasandy ıntellektini engizý jónindegi keshendi jospardy júzege asyrý sharalarynyń bir bóligi.
Mańyzdy kezeńderdiń biri jýyrda Úrimshi (QHR) qalasynda qazaqstandyq Q.AI jasandy ıntellekt kompanııasy men álemdik deńgeıdegi jasandy ıntellekt salasynyń sarapshysy, Qazaqstan Respýblıkasy Prezıdenti janyndaǵy Jasandy ıntellekt jónindegi keńestiń múshesi Lı Kaı-Fý negizin qalaǵan halyqaralyq 01.AI kompanııasy arasynda jobany kezeń-kezeńimen keńeıtý týraly kelisimge qol qoıylýy boldy.
Joba kezeń-kezeńimen keńeıtiledi:
-
2027 jylǵy qańtarda qatysýshy mektepterdiń sanyn keminde 50-ge deıin kóbeıtý josparlanýda;
-
sáýirde 440-qa deıin;
-
2028 jyldyń shildesine qaraı elimizdiń 2,6 myńǵa jýyq shaǵyn jınaqty mektepteri tolyq qamtylmaq.
Oqý protsesi qashyqtan oqytý tehnologııalaryn qoldana otyryp, gıbrıdti model boıynsha qurylǵan: pedagogter «Órleý» ulttyq biliktilikti arttyrý ortalyǵynyń bazasynda arnaıy jabdyqtalǵan stýdııadan onlaın rejımde sabaq ótkizedi. Bul ýaqytta aýyldyq synyptarda jergilikti muǵalimder sabaq barysynda balalarǵa materıaldy ıgerýge birge kómektesedi, al oqýshylardyń belsendiligi men qatysýyn baqylaý ınteraktıvti klıkerler men tsıfrlyq quraldardyń kómegimen júzege asyrylady.
Sonymen bir mezgilde pedagogterdi, mektep basshylaryn jáne aýdandyq bilim bólimderiniń mamandaryn daıarlaý jalǵasady.
«Ulttyq aqparattyq tehnologııalar» AQ-nyń bazasynda otandyq sýperkompıýterlik klasterdiń esepteý qýattaryn paıdalanatyn JI-platformanyń tehnologııalyq negizi ornalastyrylǵan.
Q.AI kompanııasynyń bas dırektory Dmıtrıı Mýn birlesken joba qala men aýyl oqýshylary arasyndaǵy bilim sapasyndaǵy alshaqtyqty joıýǵa arnalǵanyn atap ótti.
— Qazaqstanda aýyldyq jerlerde shamamen 2,6 myń shaǵyn jınaqty mektep bar. Olarda ár synypta 5–6 oqýshydan bilim alady. Ár pán boıynsha bilikti pedagogterdi tartýǵa barlyq jerde múmkindik bola bermeıdi. Bizdiń joba — osy mindetti iske asyrýǵa baǵyttalǵan praktıkalyq qadamdardyń biri. Astananyń bilikti muǵalimderi aýyl mektepterine onlaın formatta tikeleı sabaq ótkizedi. Sonymen qatar synyptaǵy muǵalim balalardyń janynda, al JI oqýshylardyń jaýaptaryn taldaıdy, bilimdegi olqylyqtar men álsiz jaqtardy tabýǵa jáne kimge qosymsha kómek qajet ekenin aıqyndaýǵa kómektesedi. ıAǵnı, biz derbes bilim berý modeline kóship jatyrmyz. Bul rette jasandy ıntellekt muǵalimdi almastyrmaıdy, kerisinshe onyń múmkindigin arttyryp, jumysyn tıimdi etedi. Búginde Qazaqstannyń eń shaǵyn mektepterinde eldiń bolashaq ǵalymdary, kásipkerleri, memlekettik qyzmetshileri men tehnologııalyq kóshbasshylary bilim alyp ósip keledi. Dál osyndaı jobalar úshin Qazaqstan men Qytaı búginde tehnologııalardy, tájirıbe men adamdardy biriktiredi, — dep atap ótti Dmıtrıı Mýn.
Qashyqtan oqytý men jasandy ıntellektini ushtastyrý aýyl oqýshylarynyń zamanaýı bilim berý resýrstaryna qoljetimdiligin keńeıtip, neǵurlym derbes oqytý tásilin qamtamasyz etýge jáne turǵylyqty jerine qaramastan balalarǵa sapaly bilim alýǵa teń múmkindik jasaýǵa jol ashady. Sonymen qatar joba muǵalimder men oqýshylardyń tsıfrlyq quzyrettiligin damytýǵa yqpal etýi kerek.
Buǵan deıin jasandy ıntellekt eldiń 2,5 myń aýyl mektebine engiziletinin jazdyq.
