Aýyl muǵalimi jolda turyp qalǵan kólikterge jol kórsetip, 4 shaqyrym jaıaý júrgen
PAVLODAR. KAZINFORM - Marııa Bedrınanyń mamandyǵy – muǵalim, jergilikti mektepterdiń birinde matematıka jáne ınformatıka páninen sabaq beredi. Onyń batyldyǵy jerlesterin tánti etip otyr.
Kerekýde birneshe kún qatarynan soǵyp turǵan aq tútek boran talaı jolaýshynyń saparyn bógep, jol qozǵalysyn qıyndatty. Osyndaı syn saǵattarda jol boıynda turyp qalǵan kólikterge kómekke kelip, at qulaǵy kórinbeıtin boranda jol kórsetken Marııa Bedrınanyń áreketin kópshilik erlikke balap otyr.
Ol Aqsý men Pavlodar qalalary arasyndaǵy avtojolda turyp qalǵan kólikterdiń aldyna shyǵyp, tórt shaqyrym boıy jaıaý júrip otyrǵan. Sonyń nátıjesinde barlyq jolaýshy Pavlodar qalasynyń irgesindegi Atameken kentine aman-esen jetken.
Marııa Nıkolaevnanyń jurtty súısintken bul isi qazir áleýmettik jelide tarap jatyr. Al qaısar jan óz áreketin erlik dep oılamaıdy.
- Bul kúni otbasymyzben Aqsý qalasynan úıimizge oralyp kele jatqan edik. Tereńkól aýdanynyń ortalyǵynda turamyz. Kólik rýlinde kúıeýim boldy. Saǵat kúndizgi úsh-tórtterdiń shamasynda Aqsýdan uzaı bergende aýa raıy kúrt buzylyp, aq tútek boran bastalyp ketti. Jol múlde kórinbeı qalǵan soń, jıekke túsip ketemiz be dep qoryqqan kólikter birinen soń biri toqtaı bastady. Sol sátte eń bastysy Atameken kentine jetýimiz kerek ekenin, turyp qalsaq kólikterimizdi qar basyp qalatynyn túsindim de, kólikten shyǵyp alǵa qaraı júre berdim. Sóıtsem bizdiń aldymyzda shamamen alty kólik tur, onyń úsheýi joldyń eki jolaǵyn da jaýyp tur. Arly-berli kólikterdiń ótýi múmkin emes. Bireý jol bastaýy kerek boldy. Al joldasym kólik rýlinde maǵan qaraǵanda ózin senimdirek sezinedi. Sondyqtan alǵa shyqtym da, alǵashqy turǵan kóliktiń terezesin tyqyldatyp, sońymnan er dep belgi berdim, - deıdi ol.
Osylaısha ol birde toqtap, birde alǵa jyljıdy. Kún sál ashylǵan sátte kólikterdiń basynda kele jatqan ózge áıel adamnyń kóligine minip, jylynyp otyrǵan. Shamamen tórt shaqyrym joldy basyp ótkende Atameken kentine kireberistegi kópirge jetedi.
- Men úshin eń bastysy bul kúni úıge aman-esen jetý edi. Úıde balalarymyz kútip otyr. Salonda bizben birge qyzym bolǵan, onyń ómiri úshin de alańdadym. Onyń ústine kolonnanyń aldyndaǵy kólikti basqaryp kele jatqan áıel adamnyń boıyndaǵy úreıin basqym keldi. Meni kórip, júregi ornyna tústi. Eń qyzyǵy, boıymda qorqynysh degen múlde bolǵan joq. Áli aıaz tura qoımaǵan ýaqyt edi, jaýraǵan da joqpyn. Tek sol sátte byltyr teledıdardan kórgen bir oqıǵa oıyma oraldy. Borandy kúni jas polıtseı qanshama kólikterdi jaıaý bastap, qar qursaýynan alyp shyqqan. Ol ýaqytta aıaz bolǵan edi, al meniń jaǵdaıym oǵan qaraǵanda táýir ekenin sezindim, - dep qosty Marııa Nıkolaevna.
Marııa Bedrınanyń jasy 49-da. Búginde Tereńkól aýdanyna qarasty Peschan №1 mektebinde matematıka men ınformatıka pánderinen sabaq berip júr. Bilim salasyndaǵy jalpy eńbek ótili 25 jyldan asady. Joldasy ekeýi otbasynda úsh bala tárbıelep otyr.
Áleýmettik jeli qoldanýshylary búginde Marııa Nıkolaevnanyń batyldyǵyn erlikke balap, ony marapatqa usynýǵa laıyq dep jazyp jatyr. Qaısar názik jannyń kópti tánti etken isi ózgelerge úlgi bolarlyqtaı.
Eske sala keteıik, ótken táýlikte Pavlodar oblysynda qar qursaýynan 30-ǵa jýyq adam qutqaryldy.