Aýyl muǵalimi matematıka sabaǵyn qyzyqty ótkizýdiń ádisin tapty
ASTANA. KAZINFORM — Aýyl muǵalimi matematıka sabaǵyn qyzyqty ótkizý úshin erekshe tehnıkany qoldanyp júr. Jas maman ınteraktıvti ádisterimen Jibek Joly telearnasyndaǵy «Búgin Live» baǵdarlamasynda bólisti.
Móldir Sáýrenbek Aqmola oblysy Qoıandy aýylyndaǵy mektepte matematıka páninen sabaq beredi. «Altyn belgimen» mektep bitirip, joǵary oqý ornynda grantpen bilim alǵan ol eńbek jolyn aýyldan bastaýdy tańdaǵan.
— Ózim aýyl mektebin támamdadym. Bala kezimnen muǵalim bolýdy armandadym. Osy maqsatqa jetýime synyp jetekshim, matematıka páninen sabaq bergen Aqmaral Baqytqyzynyń yqpaly zor boldy, — dedi ol.
Jas maman qyrkúıek aıynan bastap 5-6-synyptarǵa matematıkadan, 8-synypqa algebradan sabaq berip keledi.
— Matematıka — kúrdeli pánderdiń biri. Sondyqtan oqýshylarǵa qıyn esepterdi jeńil jolmen túsindirýge, árqaısysymen til tabysýǵa tyrysamyn, — dedi muǵalim.
Oqýshylardyń nazaryn aýdarý úshin jas maman tsıfrlyq quraldardy tıimdi paıdalanady. Wordwall jáne LearningApps platformalary arqyly tapsyrmalar ázirlep, matematıkalyq pazldar men «Oılan, tap» ádisin qoldanady. Aıtýynsha, bul tásilder oqýshylardyń pánge qyzyǵýshylyǵyn arttyryp, logıkalyq oılaý qabiletin damytýǵa kómektesip júr.
Buǵan deıin bilim salasyna 7 jylda 1,5 trln teńgeniń granty bólingenin jazǵan edik.
