Aýyl muǵalimi 1500-den astam asyqtan torsyq jasap shyqty
ÓSKEMEN. KAZINFORM – Shyǵys Qazaqstan oblysy Tarbaǵataı aýdany Jetiaral aýylynyń muǵalimi 1 500-den astam asyqtan bıiktigi 113 sm-ge jetetin torsyq jasap shyqqan.
Ertis Shoqanov Tarbaǵataı aýdany Jetiaral aýylynda dúnıege kelgen. Bala kezden sýret salýǵa qushtar bolǵan. Mektep bitirgen soń Semeı memlekettik pedagogıkalyq ýnıversıtetine «kórkem sýret jáne grafıka» fakýltetine oqýǵa túsken. Búginde týǵan jerindegi orta mektepte beıneleý óneri jáne kórkem eńbek pánderinen sabaq beredi. Jumystan tys ýaqytta sýret salyp, túrli músinder jasaıdy.
– Óskemende Tarbaǵataı aýdanynyń mádenı kúnderi ótetinin, onda kórme qoıylatynyn estidim. Soǵan óz úlesimdi qosqym keldi. Oılana kele asyqtan torsyq jasaýdy uıǵardym. Áýeli aýdannyń ár túkpirindegi mektepterden asyq jınadyq. Barlyǵy 2 myńǵa jýyq asyq jınaldy. Sóıtip, jumysty bastap kettik, - deıdi Ertis Shoqanov.
Eń áýeli torsyqtyń qańqasy quryldy. Ol 6 mılımetrlik temirden ıilip otyryp jasaldy.
– Kóbirek asyq ketsin dep kólemdirek qylyp aldym. Basynda biraz qıynshylyqtar boldy. Ony qalaı ornatamyn, ári ýaqyt jaǵy da tyǵyzdaý degendeı. Basynda asyqty tesip otyryp, temirge aınaldyryp tizip quramaqshy boldym. Alaıda jeńildeý joly tabyldy. Syrtyn tormen orap aldym da asyqty ystyq jelimmen jabystyramyn dep sheshtim. Biraq jalǵyz istesem buǵan endi biraz aınalatyn edim. Sondyqtan qolynan is keletin áriptesterimdi kómekke shaqyrdym. Osylaısha, 5 kúnniń ishinde torsyqty jasap shyqtyq, - deıdi muǵalim.
1 500-den astam asyqtan turatyn torsyqtyń bıiktigi – 113 sm. Asyqtardyń ishinen keletinderin suryptap shyǵýdyń ózi ońaı sharýa bolmaǵan.
– Endi bul torsyqtyń sımvoldyq máni týraly aıtyp bersem. Usaq asyqtar quralyp otyryp, bir úlken torsyqqa aınalyp otyr ǵoı. ıAǵnı, bereke-birlik arqyly alynbaıtyn qamaldyń joqtyǵyn, jumyla kóterilgen júktiń jeńildigin, ár azamat eliniń bir kirpishi bolyp qalansa Otanymyzdyń damıtynyn jetkizgimiz keldi. Onyń ústine ózimizdiń ulttyq ydysty nasıhattaýdyń joly. Asyqtan quralýynyń ózi de bala kezimizdegi súıikti oıynymyzdy óskeleń urpaqqa kórsetýdiń joly, - deıdi Ertis Shoqanov.
Kórmege qoıylǵan torsyqqa jınalǵan jurt joǵary baǵasyn bergen. Ustaz óz sózinde aldaǵy ýaqytta da qolóner arqyly ulttyq ydys-buıymdardy, qazaqtyń salt-dástúri men mádenıetin nasıhattaı beretinin jetkizdi.
Eske sala ketsek, buǵan deıin Túrkistanda Qolónershiler qalashyǵy ashylǵany habarlanǵan.