Aýyl men qala turǵyny jalaqysyndaǵy alshaqtyq 2-3 ese, al alatyn azyq-túliginiń baǵasy birdeı — Beısenbaev

ASTANA. KAZINFORM — Aýyl men qala turǵyny jalaqysyndaǵy alshaqtyq 2-3 ese, al alatyn azyq-túliginiń baǵasy birdeı. Mundaı pikirdi Jibek Joly telearnasynyń «Ýáde» baǵdarlamasyna bergen suhbatynda Májilis depýtaty Elnur Beısenbaev bildirdi. 

— Elimizde 3,5 mln-ǵa jýyq azamat eń tómengi jalaqy alady. Onyń 1,5 mln-ǵa jýyǵy — aýyl turǵyndary. Shyny kerek, aýyl men qala turǵyndarynyń tabysy arasyndaǵy aıyrmashylyq 2,5-3 esege deıin barady. Al aýyldaǵy ettiń, nannyń, maıdyń baǵasy qaladaǵy dál sondaı azyq-túliktiń baǵasymen tepe-teń, — dedi Elnur Beısenbaev.

Osy oraıda da iri qalalardaǵy keıbir memlekettik mekemelerdegi jalaqynyń da mardymsyz ekenin jasyrmady.

— Bir mysal keltireıin. Qazaqstanda iri 2 arhıv bar. Biri — Ulttyq arhıv. Ekinshisi — Almatydaǵy Memlekettik arhıv. Ulttyq arhıvtiń ataýy ǵana ulttyq, mártebesi joq. Ústemaqy tólenbeıdi. Tek ulttyq degen ataýdy bergenimen Úkimet qaýly shyǵarmaǵan. Jalaqylary tómen. Ulttyq arhıvtegi eń tómengi jalaqy 120 myń, eń joǵarysy shamamen 300-350 myń teńge ǵana. Bul — barlyǵymyzdyń qujatymyz jınalatyn arhıv. Osy máseleni kóterip, zerttedik. Bıýdjettik usynym berdik. Mınıstrlikpen jumys istedik. Keshe ǵana Úkimettiń bıýdjettik ótinimi ótti. Endi shamamen 500-600 mln teńge bólinedi. Olardyń jalaqysy 1,75 koeffıtsıentke ósedi, — dedi Májilis depýtaty. 

Aıta ketelik Májilis depýtaty Elnur Beısenbaev Jibek Joly telearnasynyń «Ýáde» baǵdarlamasyna bergen suhbatynda el turǵyndary qandaı máselelerdi jıi kóteretinin aıtty.