Aýyl men qala mektepteri arasyndaǵy bilim sapasy alshaqtyǵyn azaıtý úshin ne istelinip jatyr
ASTANA. KAZINFORM — Premer-mınıstrdiń orynbasary — Mádenıet jáne aqparat mınıstri Aıda Balaeva Májilis depýtattarynyń saýalyna bergen jaýabynda aýyl men qala mektepteri arasyndaǵy bilim sapasy alshaqtyǵyn azaıtý úshin ne istelinip jatqanyn aıtty.
— Memleket basshysynyń 2025 jylǵy Joldaýynda bergen tapsyrmasynyń aıasynda aýyldyq jáne qalalyq mektepterdiń arasyndaǵy bilim sapasy alshaqtyǵyn qysqartý maqsatynda «Qazaq Digital Mektebi» modeli ázirlendi. Sonymen qatar mınıstrlikpen (Oqý-aǵartý mınıstrligi) «Aýyl mektebi — sapa alańy» aýyl mektepterindegi bilim sapasyn arttyrýǵa baǵyttalǵan jobalar iske asyrylýda. Joba aıasynda memleket, jeke sektor jáne qoǵamdyq qorlardyń qatysýymen birneshe óńirde júıeli jumystar júrgizilýde, — dedi vıtse-premer.
Máselen, onyń málimetinshe, 2023-2024 oqý jylynda Aqtóbe oblysynda «Tsıfrlyq tehnologııalardy paıdalanyp, Aqtóbe oblysynyń shaǵyn jınaqty aýyldyq mektepteriniń áleýetin damytý» jobasyna bes pán (aǵylshyn tili, fızıka, hımııa, matematıka, bıologııa) boıynsha 134 shaǵyn jınaqty mektep (5 304 bilim alýshy, 223 pedagog) qatysty. Nátıjesinde oqýshylardyń bilim sapasy joǵarylady (aǵylshyn tili — 3,7%, fızıka — 2,4%, hımııa — 2,7%, matematıka — 5,1%, bıologııa — 4,1%). Búgingi kúni pılottyq joba basqa óńirlerge taratyldy.
— Jalpy qazirgi kezde jobamen elimizdiń 17 óńirindegi 299 tirek jáne 1 122 shaǵyn jınaqty mektepter qamtyldy. Sondaı-aq jobany tıimdi iske asyrýdy qamtamasyz etý jáne aýyl mektepteriniń bilim sapasyn arttyrý úshin «Aýyl mektebi — sapa alańy» tujyrymdamalyq tásilderi ázirlendi, — dedi ol.
Vıtse-premer 2023-2024 oqý jylynda Almaty oblysynda 50 mektepti qamtıtyn jaratylystaný-matematıkalyq baǵyt pánderi boıynsha bilim sapasyn arttyrý maqsatynda «Bilim-ınnovatsııa» lıtseıleriniń tájirıbesine negizdelgen joba «Qazaqstan halqyna» qorynyń qarjylaı qoldaýymen júzege asyrylǵanyn aıtady.
— Jobany iske asyrý barysynda fızıka, hımııa jáne bıologııa oqý kabınetterin praktıkalyq sabaqtar men zerthanalyq jumystardy júrgizý úshin zamanaýı jabdyqtarmen jaraqtandyrý, pedagogterdiń biliktiligin arttyrý, oqýshylardy pándik olımpıadalarǵa daıyndaý boıynsha jumystar júrgizildi. Nátıjesinde 3 847 pedagog biliktilikti arttyrý kýrstarynan ótti, jaratylystaný-matematıkalyq baǵyttaǵy pánder boıynsha oqýshylardyń úlgerimi (fızıka — 10%, hımııa — 6%, bıologııa — 9%), respýblıkalyq pándik olımpıadada júldeli oryndarǵa (1 — altyn medal, 4 — kúmis medal, 3 — qola medal) ıe bolǵan oqýshylardyń úlesi artty, — dedi Aıda Balaeva.
Buǵan deıin elimizde orta bilim sapasyn táýelsiz baǵalaıtyn ulttyq zertteý ortalyǵyn qurý máselesi pysyqtalatynyn jazǵan edik.