Aýyl men qala mektepteri arasyndaǵy bilim alshaqtyǵy azaıyp keledi – Mınıstr

ASTANA. KAZINFORM - Elimizdegi 8 myńǵa jýyq mekteptiń 67% nemese 5247-si – aýyl mektebi. Oqýshylardyń 40%-y aýyl mektebinde bilim alady. Búgin Oqý-aǵartý mınıstri Ǵ.Beısembaev aýyl mektepterin damytý sharalary týraly aıtyp berdi.

мектеп
Фото: Ағыбай Аяпбергенов/Kazinform

«Aýyl men qala mektepteri arasyndaǵy bilim sapasyndaǵy alshaqtyqty PISA halyqaralyq zertteýleri aıqyndap otyr. Degenmen PISA-2018 nátıjelerimen salystyrǵanda, 2022 jylǵy matematıkalyq jáne jaratylystaný saýaty boıynsha aıyrmashylyq kórsetkishi 4-5 balǵa deıin qysqardy, al oqý saýattylyǵy ózgerissiz qalyp otyr», - dedi Ǵ.Beısembaev búgingi Úkimet otyrysynda.

Oqý-aǵartý mınıstrligi 2023 jyldan bastap «Aýyl mektebi – sapa alańy» respýblıkalyq jobasyn iske asyrýda.

Almaty oblysynda byltyrǵy oqý jylynda «Qazaqstan halqyna» qorynyń qarjylaı qoldaýymen 50 mektepte jaratylystaný-matematıkalyq baǵyt pánderi boıynsha bilim sapasyn arttyrý úshin «Bilim-ınnovatsııa» lıtseıleriniń tájirıbesine negizdelgen joba júzege asty.

Mańǵystaý oblysy mektepteriniń bilim sapasyn arttyrý úshin bıyl 50 mektepti, onyń ishinde 35 aýyl mektebin qamtıtyn «Otpan» jobasy bastaldy.

«Aqtóbe oblysynda byltyr oblys ákimdiginiń jáne «Qazaqstan halqyna» qoǵamdyq qorynyń qatysýymen «Tsıfrlyq tehnologııalardy paıdalanyp, aýyl mektepteriniń áleýetin arttyrý» jobasy júzege asyryldy. Jobaǵa 12 tirek jáne 134 shaǵyn jınaqty mektep, 11 myńnan astam bilim alýshy men 3,5 myńǵa jýyq pedagog qatysty. Y.Altynsarın atyndaǵy ulttyq bilim akademııasy, «Órleý» biliktilikti arttyrý ulttyq ortalyǵy, A.Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵy jáne «Nazarbaev zııatkerlik mektepteri» jáne «Bilimdi turaqty damytý» qory jobanyń tabysty ótýin qamtamasyz etti», - dedi sala mınıstri.

Joba aıasynda tirek mektepteriniń materıaldyq-tehnıkalyq bazasy tolyǵymen jańartylyp, shaǵyn jınaqty mektepter pándik jáne tsıfrlyq kabınettermen jabdyqtalǵan. Mektepterge jyldamdyǵy joǵary ınternet ornatylǵan.

Joba aıasynda júrgizilgen keshendi jumystar shaǵyn jınaqty mektepterdegi bilim sapasynyń artýyna yqpal etti. Muny 6, 8 jáne 10 synyptardaǵy oqý úlgeriminiń nátıjesi rastady.

«Aprobatsııadan ótken oqytýdyń 4 modeliniń ishinde «Tirek mektebi – shaǵyn jınaqty mektep» modeli tıimdiligin kórsetti. Osyǵan oraı, respýblıkalyq jobany masshtabtaý usynylyp otyr. Ákimdik jergilikti bıýdjetten tirek jáne shaǵyn jınaqty mektepterdiń materıaldyq-tehnıkalyq bazasyn jańartýǵa, sapaly ınternetpen qamtamasyz etýge, tirek mektepteriniń pedagogterin yntalandyrý úshin ústemeaqy tóleýge qarajat bólýdi josparlaýy qajet», - dedi Ǵanı Beısembaev.

Bıyl jobaǵa Aqmola, Qostanaı, Pavlodar, Batys Qazaqstan jáne Soltústik Qazaqstan oblystaryndaǵy 10 tirek jáne 30 shaǵyn jınaqty mektep tartylýda.

2025 jyldyń qańtarynan bastap jobaǵa 17 óńirdiń 192 tirek jáne 759 shaǵyn jınaqty mektebi qatysady.

Al úshinshi kezeńde osy jobaǵa qalǵan shaǵyn jınaqty mektepterdiń barlyǵy tolyǵymen qamtylýy qajet.

Сейчас читают