Aýyldyń oqýshylaryna arnalǵan respýblıkalyq olımpıadanyń II kezeńi bastaldy

ASTANA. KAZINFORM — 8-10 qazan aralyǵynda Qazaqstanda aýyl mektepteriniń 9-11(12)-synyp oqýshylary arasynda jalpy bilim beretin pánder boıynsha Respýblıkalyq olımpıadanyń ekinshi (aýdandyq) kezeńi ótip jatyr, dep habarlaıdy Oqý-aǵartý mınıstrligi.

Olımpıadanyń basty maqsaty — aýyl mektepteriniń oqýshylary úshin teń múmkindik qalyptastyrý, daryndy ári akademııalyq qabileti joǵary balalardy qoldaý jáne olardyń zııatkerlik ári kásibı damýyna jaǵdaı jasaý.

— Ekinshi kezeńge birinshi týrda baq synaǵan 83 myń qatysýshynyń ishinen iriktelgen 62 myńnan astam oqýshy qatysyp jatyr. Sonymen qatar sanıtarııalyq-epıdemıologııalyq talaptardyń saqtalýyna jáne qatysýshylarǵa jaıly jaǵdaı jasaýǵa erekshe nazar aýdarylǵan. Olımpıada 13 pán boıynsha — altaýy jaratylystaný-matematıkalyq jáne jeteýi qoǵamdyq-gýmanıtarlyq baǵytta — tórt kezeńnen turady. Birinshi kezeńge qatysý úshin smart.daryn.kz saıtynda 125 myńnan astam oqýshy tirkeldi, — delingen habarlamada.

Aýdandyq saıystyń jeńimpazdary úshinshi (oblystyq) kezeńge qatysady. Ol qarasha–jeltoqsan aılarynda dástúrli formatta, eki týr boıynsha ótedi. Erejege sáıkes, ár oblystan 780 oqýshy qatysady.

Osyǵan deıin Prezıdent Beıjińde JI boıynsha ótken halyqaralyq olımpıada jeńimpazdarymen júzdeskenin jazǵan edik.