Aýyl mektebiniń oqýshylary qorshaǵan ortany tazartýǵa arnalǵan robot qurastyrdy
ASTANA. KAZINFORM – «Jalyn» dep atalǵan robot turmystyq qaldyqtar men japyraqtardy jınaı otyryp, arnalardyń taza bolýyn jáne sýdyń kedergisiz aǵýyn qamtamasyz etedi. Bul týraly Oqý-aǵartý mınıstrliginiń baspasóz qyzmeti habarlady.
«100 jańa esim — 100 novyh lıts» aıdarynda biz ózgelerge úlgi bolarlyq jáne bilim berýge jańa serpin beretin tulǵalar jaıly baıandaımyz. Bul jolǵy keıipkerlerimiz — Abaı oblysy Aıagóz aýdanynyń qazaq mektep-lıtseıinde oqıtyn 5-synyp oqýshylary: Ersultan Jumataı, Ámirhan Sapıev pen Ákejan Berikqazy. Olar sý arnalaryndaǵy qoqysty avtomatty túrde tazartatyn erekshe robot jasap shyqty.
Jobanyń negizgi maqsaty — sý arnalarynda qoqystardyń jınalýynyń aldyn alý. Oqýshylar ekologııa, ınjenerııa jáne robototehnıka sabaqtarynda alǵan bilimderi boıynsha qurastyrǵan.
«Jalyn» dep atalǵan robot turmystyq qaldyqtar men japyraqtardy jınaı otyryp, arnalardyń taza bolýyn jáne sýdyń kedergisiz aǵýyn qamtamasyz etedi.
Ideıadan bastap iske asyrýǵa deıingi barlyq kezeńderdi oqýshylar ózderi oryndap, mehanıkalyq tazartý qaǵıdalaryn jáne baǵdarlamalaýdyń negizderin zerttegen.
— Bizge bul ıdeıa Prezıdentimizdiń «Taza Qazaqstan» bastamasynyń arqasynda keldi. Robotymyz týǵan aýylymyzda tazalyqty saqtaýǵa kómektesse deımiz. Al bolashaqta qoqysty jınap qana qoımaı, ony suryptaı alatyn mını-robot jasaýdy josparlap otyrmyz, — deıdi oqýshylar.
Aıta keteıik, joba 2024 jylǵy FIRST Championship aımaqtyq kezeńinde joǵary baǵalanyp, úzdik ondyqqa enip, áleýmettik máselelerdi sheshýge qosqan úlesi, jańashyldyǵy men komandalyq jumysy úshin Core Values Winner nomınatsııasynda marapatqa ıe boldy.
Aıta ketelik Mańǵystaýlyq oqýshy Azııa-Tynyq muhıty aımaǵynyń eń úzdik lıngvısi atanǵan edi.