Aýyl mektebine jańa múmkindik: memleket pen bıznes Prezıdent tapsyrmasyn birge júzege asyryp jatyr
ÓSKEMEN. KAZINFORM – ShQO-da aýyl mektepteriniń ınfraqurylymy jańaryp, balalarǵa qaladaǵydaı jaǵdaı jasalýda.
Shyǵys Qazaqstanda aýyl mektepterin jańǵyrtý jumystary jalǵasýda. Memlekettik qoldaý men bıznestiń áleýmettik jaýapkershiligi qatar ushtasqan bul baǵyt Prezıdent Qasym-Jomart Toqaevtyń aýyl balalaryna sapaly bilim alýǵa teń múmkindik jasaý jónindegi tapsyrmalaryn iske asyrýǵa baǵyttalǵan.
Shyǵys Qazaqstan oblysynyń ákimi Nurymbet Saqtaǵanov Samar aýdanyna jumys sapary barysynda Samar aýylynda jańadan ashylǵan Ybyraı Altynsarın atyndaǵy bastaýysh mekteptiń jumysymen tanysty.
40 jyldan astam ýaqyttan keıin Samar aýylynda alǵash ret jańa mektep ǵımaraty boı kóterdi. 1 qyrkúıekte paıdalanýǵa berilgen zamanaýı eki qabatty bilim ordasy 150 oqýshyǵa arnalǵan.
Oblystyq bıýdjet esebinen salynǵan mekteptiń jalpy aýmaǵy shamamen 3,8 myń sharshy metrdi quraıdy. Munda balalardyń sapaly bilim alýyna ǵana emes, sportpen aınalysyp, shyǵarmashylyq qabiletin damytýyna da múmkindik jasalǵan.
Mektepte zamanaýı oqý kabınetteri, sport zaly, kitaphana, ashana, logoped kabıneti, balalarǵa arnalǵan shaǵyn ortalyq jáne shaǵyn fýtbol alańy bar.
Jańa oqý jylynda Samar aýdanynda 172 bala birinshi synypqa barsa, onyń 14-i jańa mektepte bilim alyp jatyr.
Mektepti aralaý barysynda oblys ákimi oqý kabınetteriniń jabdyqtalýymen tanysyp, oqýshylarǵa jasalǵan jaǵdaıdy kórdi.
«Prezıdentimiz Qasym-Jomart Toqaevtyń tapsyrmasy boıynsha bilim berý uıymdarynyń ınfraqurylymyn jaqsartý baǵytynda tıisti jumystar atqarylyp jatyr. Aýyl mektepterinde de qaladaǵydaı jaǵdaı bolýy kerek. Oqýshylar jaıly synyptarda zamanǵa saı bilim alýy tıis. Osy baǵyttaǵy jumysty ary qaraı jalǵastyramyz», — dedi Nurymbet Saqtaǵanov.
Aımaq basshysynyń aıtýynsha, aýyl mektebin jańǵyrtý — tek jańa ǵımarat salý emes. Bul — aýyl balasyna sapaly bilimmen qatar, zamanaýı orta men óz qabiletin damytýǵa qajetti múmkindikter berý.
Bul baǵyttaǵy jumystyń taǵy bir mysaly — Qulynjon aýylyndaǵy jańa ınternat pen sport kesheni.
Nurymbet Saqtaǵanov aýylǵa jumys sapary barysynda jańa nysandardyń ashylýyna qatysty. Internat shalǵaı eldi mekenderden keletin oqýshylarǵa qolaıly jaǵdaı jasasa, sport kesheni balalardyń bos ýaqytyn tıimdi ótkizip, sportpen turaqty aınalysýyna múmkindik beredi.
Jobanyń júzege asýyna bıznes ókili, metsenat Aıdyn Rahymbaevtyń qarjylaı qoldaýy kórsetildi. Osylaısha, memleket tarapynan jasalyp jatqan júıeli jumysqa bıznestiń áleýmettik jaýapkershiligi de qosylyp otyr.
Aımaq basshysy aýyl balalarynyń óz qabiletin damytýy úshin tańdaý múmkindigi men qajetti keńistiktiń bolýy mańyzdy ekenin atap ótti.
Qulynjon aýylyndaǵy Qulynzhon Mektebi bıyl 60 jyldyq mereıtoıyn atap ótýde. Osy ýaqyt ishinde bilim ordasy aýyl turǵyndarynyń birneshe býynyn biriktirip, talaı shákirtke bilim men tárbıe berip keledi.
Búginde mektepterdi jańǵyrtý, jańa áleýmettik nysandar salý jáne bıznes ókilderin áleýmettik jobalarǵa tartý — aýyldardyń turaqty damýynyń mańyzdy bóligi. Memleket pen bıznestiń birlesken jumysy shalǵaı eldi mekenderdegi balalarǵa sapaly bilim alyp, sportpen jáne shyǵarmashylyqpen aınalysýǵa teń múmkindik berýge jol ashady.
