Aýyl mektebindegi STEM: Astanada aýyl muǵalimderi bas qosty
ASTANA. KAZINFORM — Astana qalasynda «Aýyl mektebindegi STEM: ıdeıadan turaqty tájirıbege» atty respýblıkalyq ádistemelik ıntensıv ótip jatyr. Bul týraly Oqý-aǵartý mınıstrliginiń baspasóz qyzmeti jarııalady.
Aýqymdy sharaǵa elimizdiń ár óńirinen myńǵa jýyq aýyl muǵalimi qatysyp jatyr. Onyń ishinde 200-ge jýyq pedagog respýblıkalyq ıntensıvke oflaın formatta qatyssa, 800-den astam aýyl muǵalimi onlaın rejımde biliktilikterin arttyrýǵa múmkindik aldy.
Sharaǵa QR Oqý-aǵartý mınıstri Juldyz Súleımenova qatysyp, Memleket basshysy Qasym-Jomart Toqaevtyń qoldaýymen bilim salasynda júzege asyp jatqan júıeli reformalarǵa toqtaldy.
— Memleket basshysy Qasym-Jomart Toqaevtyń naqty qoldaýy jáne irgeli reformalarynyń nátıjesinde bilim salasynda sheshimin tapqan júıeli ári keshendi nátıjeler bar. Memleket basshysynyń tapsyrmasymen alǵash ret balalardyń quqyqtaryn qorǵaý salasyndaǵy memlekettik saıasatty júıeleýge baǵyttalǵan «Qazaqstan balalary» 2026–2030 jyldarǵa arnalǵan biryńǵaı tujyrymdamasy ázirlendi. Onyń aıasynda alǵash ret osy saladaǵy barlyq qoldanystaǵy sharalar men baǵdarlamalar biryńǵaı strategııalyq negizge biriktirildi, — dedi Juldyz Súleımenova.
Mınıstr óz baıandamasynda 2025 jyldy orta bilim salasy úshin «tarıhı jyl» dep baǵalap, oqýshylardyń halyqaralyq arenadaǵy jetistikterine toqtaldy. Máselen, 1 720 oqýshy halyqaralyq olımpıadalar men ǵylymı konkýrstarda baq synap, el qorjynyna 1 006 medal saldy. Memleket basshysynyń bastamasymen olımpıada júldegerleri men olardyń tálimgerlerine 100 mıllıon teńgeden astam qarajat tólendi. Keler jyldan bastap mundaı yntalandyrý sharalary pándik olımpıadalarmen qatar halyqaralyq ǵylymı baıqaý jeńimpazdaryna da beriletin bolady.
Juldyz Súleımenova aýyl muǵalimderi aldyndaǵy baıandamasynda bilim berý ınfraqurylymyn jańǵyrtý máselesine de erekshe nazar aýdardy. Memleket basshysynyń tapsyrmasymen qolǵa alynǵan «Keleshek mektepteri» ulttyq jobasy aıasynda elimizde halyqaralyq standartqa saı 217 «Temirqazyq» mektebi boı kóterdi. Bul ınnovatsııalyq bilim ordalary zamanaýı STEM-zerthanalarmen jáne robototehnıka kabınetterimen jabdyqtalǵan.
— Qala men aýyl mektepteri arasyndaǵy alshaqtyqty joıý-memleket úshin strategııalyq basymdyq. Renovatsııadan ótetin 1 300 mekteptiń 820-sy jáne jańadan salynǵan «Keleshek mektepteriniń» 84-i dál osy aýyldyq jerlerde ornalasqan. Bul qadamdar bilim teńsizdigin joıýǵa baǵyttalǵan. Sońǵy tórt jylda elimizde 1,1 mln oqýshyǵa arnalǵan 1 242 jańa mektep salynyp, nátıjesinde úsh aýysymdy mektepter sany 4 esege, al apattyq jaǵdaıdaǵy mektepter 2,5 esege qysqardy. Bul — memlekettiń adam kapıtalyn damytýǵa qanshalyqty mán berip otyrǵandyǵynyń naqty kórinisi, — dedi sala mınıstri.
Ustazdar mártebesin kóterý baǵytyndaǵy jumystardyń nátıjesine halyqaralyq TALIS-2024 zertteýiniń qorytyndysy dálel. Qazaqstan muǵalimderdiń jalaqyǵa qanaǵattaný deńgeıi boıynsha álemdegi úzdik bes eldiń qataryna enip, bul kórsetkish 2018 jylǵy 39%-dan 71%-ǵa deıin ósti. Ustazdardyń aptalyq júktemesi men ákimshilik júktemeleriniń azaıýy pedagogterdiń 95%-ynyń óz jumysyna kóńili tolýyna septigin tıgizdi. «Pedagog mártebesi týraly» zań aıasynda mektep muǵalimderiniń eńbekaqysy eki esege artyp, ustazdardyń qoǵamdaǵy bedeli nyǵaıa tústi.
Tárbıe jumysynyń negizi retinde barlyq bilim ordalarynda «Adal azamat» birtutas baǵdarlamasy iske asyrylýda. Baǵdarlama jas urpaqtyń boıynda otanshyldyq, ádildik jáne eńbekqorlyq qundylyqtaryn qalyptastyrýdy kózdeıdi. Sonymen qatar, mektepke deıingi uıymdarda «Aqsha balamen birge júredi» vaýcherlik qarjylandyrý júıesi engizilip, kezekte turǵandar sany eki ese azaıdy. Qosymsha bilim berý salasynda da 2025 jyldan bastap birqatar óńirde «bir vaýcher — bir bala» qaǵıdaty boıynsha pılottyq jobalar qolǵa alynady.
Tsıfrlandyrý jáne jasandy ıntellektini bilim berý salasyna engizý — aldaǵy kezeńniń basty mindeti. Memleket basshysy bıylǵy jyldy «Tsıfrlandyrý jáne jasandy ıntellekt jyly» dep jarııalady. Mınıstrlik osy baǵytta «Qazaq Digital Mektebi» jobasy men «QazTech» platformasyn iske qosýda. Ótken jyly 240 myńnan astam muǵalim jasandy ıntellekt boıynsha biliktilik kýrstarynan ótse, keler jyly «ChatGPT Edu» jobasy aıasynda pedagogterdiń rýtınalyq jumysyn jeńildetetin tsıfrlyq assıstentterdi engizý josparlanyp otyr.
Astanada ótip jatqan ıntensıv baǵdarlamasy aıasynda aýyl pedagogteri qazirgi zamanǵy pedagogıkalyq jáne fasılıtatsııalyq sessııalarǵa qatysyp, tsıfrlyq tehnologııalar men jasandy ıntellektini qoldaný, jobalyq basqarý jáne komandalyq jumysty úılestirý, oqýshylardyń zertteýshilik qabiletterin ushtaý baǵyttarynda ózara tájirıbe almasýda. Sonymen qatar, respýblıkalyq ıntensıv barysynda muǵalimder óz is-tájirıbelerindegi úzdik STEM-keısterdi tanystyrdy.
Aıta keteıik, elimizde mektepter zamanaýı formatta bezendirilip jatyr. «Adal azamat» birtutas tárbıe baǵdarlamasyn kórneki súıemeldeý maqsatynda zamanaýı brendbýk ázirlendi.