Aýyl kásipkerlerine memlekettik qoldaý sharalary boıynsha 2,6 myńnan asa keńes berildi
ASTANA. KAZINFORM — «Damý» qorynyń mobıldi front-ofısteri 2,6 myńnan astam aýyl kásipkerine konsýltatsııalyq qoldaý kórsetti, dep habarlaıdy Ulttyq ekonomıka mınıstrliginiń baspasóz qyzmeti.
«Damý» kásipkerlikti damytý qory» AQ Prezıdenttiń tapsyrmasymen iske qosylǵan shaǵyn bıznesti qoldaýdyń «Іsker aımaq» biryńǵaı baǵdarlamasy aıasynda júzege asyrylyp jatqan mobıldi front-ofıster jobasyn damytýdy jalǵastyryp jatyr. Mobıldi front-ofısterdiń jumysy memlekettik qoldaý sharalaryn kásipkerler úshin barynsha qoljetimdi etip, shalǵaıdaǵy qalalar men aýyldarda jumys isteıtin kásipkerlerge oblys ortalyqtaryna barmaı-aq, bızneske arnalǵan qoldanystaǵy baǵdarlamalar boıynsha keńes alýǵa múmkindik berip otyr.
Mobıldi front-ofıster Qazaqstannyń barlyq 17 óńirinde jumys isteıdi (Astana, Almaty jáne Shymkent qalalaryn qospaǵanda). Joba iske qosylǵannan beri (2026 jylǵy 17 tamyzdaǵy jaǵdaı boıynsha), Qor mamandary 2 439 biregeı kásipkerlik sýbektisine 2 657 konsýltatsııa ótkizdi.
— Mobıldi front-ofısterdiń qyzmetine eń belsendi júgingenderdiń qatarynda — Túrkistan oblysynyń kásipkerleri. Bul óńirde 252 konsýltatsııa ótkizildi. Odan keıin Aqtóbe oblysy — 222, Soltústik Qazaqstan oblysy — 220, Pavlodar oblysy — 217 jáne Atyraý oblysy — 215 konsýltatsııadan keledi. Qalǵan 12 óńirde taǵy 1 531 konsýltatsııa ótkizildi. Mobıldi front-ofıstiń kóshpeli toby 80-ge jýyq aýdan ortalyǵynda boldy. Eń kóp suranysqa ıe bolǵan konsýltatsııa baǵyttarynyń qatarynda «Báıterek» holdınginiń Biryńǵaı front-ofısi usynatyn baǵdarlamalar men ónimder boldy — osy baǵyt boıynsha 721 ótinish tústi. Sondaı-aq kásipkerler «Іsker Aımaq» sýbsıdııalaý baǵdarlamasyna — 593 ótinish, Birinshi kepildik qory aıasyndaǵy kepildik berý quraldaryna — 480 ótinish, «Órleý» baǵdarlamasy boıynsha jeńildikti kredıtteýge — 329 ótinish, sondaı-aq mono- jáne shaǵyn qalalardaǵy, aýyldyq eldi mekenderdegi ishki saýda sýbektilerin qoldaý sharalaryna — 177 ótinish bildirdi, — delingen mınıstrlik taratqan aqparatta.
Mobıldi front-ofıs — kásipkerlerge bıznestiń ornalasqan jerine qaramastan memlekettik qoldaý sharalaryna teń qoljetimdilikti qamtamasyz etetin kóshpeli konsýltatsııalyq ortalyq. Kóshpeli top quramyna «Damý» qorynyń mamandary, ákimdikterdiń, bankterdiń, «Atameken» UKP-nyń, «Agrarlyq nesıe korporatsııasy» AQ-nyń, «QazAgroQarjy» AQ-nyń jáne konsaltıngtik kompanııalardyń ókilderi kiredi. Olar kásipkerlerge «Báıterek» holdıngi tobynyń bızneske arnalǵan memlekettik qoldaýdyń barlyq baǵdarlamalary, sonyń ishinde «Ónerkásipti damytý qory» AQ, «Qazaqstannyń Damý banki» AQ, «Qazaqstannyń eksporttyq-kredıttik agenttigi» AQ jáne «Qazaqstan Investment Corporation» AQ usynatyn múmkindikter týraly tolyq aqparat beredi. Mundaı format kásipkerlerge Holdıng tobynyń qoldanystaǵy qarjylyq quraldary boıynsha bir jerden keshendi keńes alýǵa múmkindik beredi.
Buǵan deıin mobıldi front-ofısterdiń negizgi mindeti kásipkerlerge konsýltatsııalyq qoldaý kórsetý bolsa, qazir qor jobalardy qarjylandyrý týraly sheshim qabyldanǵanǵa deıin súıemeldeýge kezeń-kezeńimen kóship jatyr. Árbir kezeńde mamandar kásipkerge eń qolaıly qarjylandyrý quralyn tańdaýǵa kómektesip, baǵdarlamalarǵa qatysý talaptaryn túsindiredi jáne jobany qaraý barysynda qoldaý kórsetedi. Qazirgi tańda qarjylandyrýǵa 4 ótinim qabyldandy.
Mobıldi front-ofıster jelisin damytý — bızneske arnalǵan memlekettik qoldaý sharalarynyń qoljetimdiligin arttyrýǵa baǵyttalǵan júıeli jumystyń bir bóligi. Osy baǵytta Bıznesti qoldaý jáne súıemeldeý ortalyqtaryn (BQSO) iske qosý da josparlanǵan.
Pılottyq joba aıasynda mundaı ortalyqtar Astana, Almaty, Shymkent qalalarynda, sondaı-aq Soltústik Qazaqstan jáne Aqtóbe oblystarynda jumys isteıdi. Soltústik Qazaqstan jáne Aqtóbe oblystarynyń kásipkerleri BQSO qyzmetterin statsıonarlyq formatta ǵana emes, mobıldi front-ofısterdiń kóshpeli saparlary kezinde de ala alady.
Mobıldi front-ofısterdiń ózekti jumys kestesimen «Damý» qorynyń resmı saıtyndaǵy «Mobıldi front-ofıs» bóliminen tanysýǵa bolady. Eger qajetti aýdan nemese eldi meken kestede kórsetilmese, kásipkerler Online Damu portaly arqyly kóshpeli sapar uıymdastyrýǵa ótinim qaldyra alady. Barlyq ótinish qordyń óńirlik fılıaldarynda qaralyp, keıingi marshrýttardy qalyptastyrý kezinde eskeriledi.
Qosymsha aqparatty «Damý» qorynyń 1408 biryńǵaı baılanys ortalyǵynyń nómiri arqyly alýǵa bolady.
