Aýyl halqynyń 62,1%-y sport ınfraqurylymymen qamtylǵan
ASTANA. KAZINFORM – Qazaqstanda aýyl turǵyndarynyń 62,1%-y sport ınfraqurylymymen qamtylǵan. Elde jańa stadıondar men sport keshenderin salý jumystary jalǵasyp jatyr, dep habarlaıdy Týrızm jáne sport mınıstrligi.
Mınıstrliktiń málimetinshe, Memleket basshysynyń tapsyrmasy aıasynda jergilikti atqarýshy organdarmen birlesip sport ınfraqurylymyn damytý jáne halyqtyń sportpen shuǵyldanýyna qolaıly jaǵdaı jasaý baǵytynda júıeli jumystar júrgizilýde.
Qazirgi ýaqytta elimizde 26 518 sport nysany jumys isteıdi. Jalpy halyqtyń sport ınfraqurylymymen qamtylý deńgeıi 59,6%-dy qurasa, aýyldyq jerlerde bul kórsetkish 62,1%-ǵa jetken.
– Búginde Qazaqstanda 30 iri stadıon bar. Sonymen qatar taǵy 15 stadıonnyń qurylysy júrgizilip jatyr. Qazirgi ýaqytta Almaty, Aqtóbe, Atyraý, Shymkent jáne Semeı qalalarynda jańa stadıondar salynyp jatyr. Bul nysandardy 2028–2029 jyldary paıdalanýǵa berý josparlanǵan, – dep málimdedi mınıstrlik.
Sport ınfraqurylymyn damytý aıasynda 2024 jyly 90 sport nysany paıdalanýǵa berilse, onyń 61-i aýyldyq jerde ornalasqan. Al 2025 jyly 147 sport nysanynyń qurylysy aıaqtalyp, onyń 107-si aýyldyq eldi mekenderde salynǵan. Bıyl taǵy 121 sport nysanyn iske qosý josparlanyp otyr.
Sonymen qatar 2026 jyldan bastap 2026–2028 jyldarǵa arnalǵan sport ınfraqurylymyn damytý jónindegi jol kartasy júzege asyrylýda. Qujat aıasynda 86 ınvestıtsııalyq jobany iske asyrý kózdelgen, onyń 56-sy aýyldyq jerlerde ornalasady.
– Balalar jáne buqaralyq fýtboldy damytý da negizgi basymdyqtardyń biri bolyp qala beredi. Memleket basshysynyń tapsyrmasyna sáıkes 2025 jyly respýblıka boıynsha 520 fýtbol alańy paıdalanýǵa berildi. Onyń 378-i aýyldyq jerlerde salyndy. Bıyl bul jumystar barlyq óńirde jalǵasyp jatyr, – delingen mınıstrlik aqparatynda.
Mınıstrliktiń málimetinshe, atalǵan jobalar halyqtyń sportpen turaqty aınalysýyna jaǵdaı jasap, buqaralyq jáne balalar sportyn damytýǵa múmkindik beredi.
Aıta keteıik, buǵan deıin aýyldarda 130 sport zaly salynyp jatqany habarlandy.
