«Aýyl el besigi» jobasynda shekaradaǵy eldimekenderge basymdyq berilý kerek — depýtat saýaly

ASTANA. KAZINFORM — Májilis depýtaty Nartaı Sársenǵalıev Premer-mınıstrdiń orynbasary Qanat Bozymbaevtyń atyna saýal joldap, «Aýyl el besigi!» jobasynyń keıbir sharttaryn ózgertýdi usyndy. 

— «Aýyl el besigi» jobasynda qarajat bólý óńirdiń turǵyndar sanyna baılanysty dep kórsetilgen. Biraq bul qate ustanym. Mysaly, 100 myń adamǵa 100 mıllıon teńge bólindi delik. Sonsha halyq bir oblystyń 4 aýylynda tursa, bir oblystyń 20 aýylynda ómir súrýi múmkin. Saldarynan atalǵan aqshany bir oblys 4 aýyldaǵy ınfraqurylymdy ustaýǵa jumsasa, basqa oblys sol qarajatty 20 aýylǵa jetkizýge májbúr. Ol jetpeıdi de. Máselen BQO-da 405 aýyl bar. Onyń 145-i shekara mańynda. Aýyldardyń sany kóp bolǵan saıyn kútip ustaýdy qajet etetin áleýmettik jáne ınjenerlik ınfraqurylymnyń da sany arta beredi, — dedi Májilis depýtaty.

Ol bul problemany sheshý úshin baǵdarlamada shekaralyq aýyldarǵa basymdyq berý kerek dep otyr.

— «Aýyl el besigi!» jobasy boıynsha bólinetin qarajatty eldimekenderiniń sanyn eskere otyryp, sonyń ishinde shekara mańynda ornalasqan aýyldarǵa basymdyq bere otyryp bólý qajet, — dedi Nartaı Sársenǵalıev.

Eske salsaq, Aqtóbe oblysynyń sharýalary Reseımen aradaǵy shekaraǵa qorshaý salýdy suraǵan edi.