«Aýyl — el besigi», «Qalalardyń shetki aýmaqtaryn damytý» baǵdarlamalary jabylady

ASTANA. KAZINFORM — Memlekettik qarajattyń basym emes salalarǵa bólinip ketýin boldyrmaý maqsatynda, olar naqty maqsatyn kórsetetin zańǵa jeke qosymsha engiziledi.

Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.

— Ótken jyly óńirlik standarttar júıesi Qazaqstan Respýblıkasynyń 2029 jylǵa deıingi ulttyq damý josparynyń túıindi ulttyq ındıkatoryna engizildi. Onyń salalar boıynsha kórsetkishteri maqsat, mindeti sondaı-aq is-sharalar men jobalardy aıqyndaı otyryp, óńirlerdi damytý jospary bar. Júıe 12 baǵytty qarastyrady. Bul baǵyttarǵa bıýdjettik jáne jeke ınfraqurylym kiredi. Onyń ishinde 8 baǵyt jergilikti bıýdjet esebinen qamtamasyz etilýi tıis shyǵystarǵa jatady. Bul baǵyttar óńirlerdi damytý bıýdjetiniń esebine alynady. Jalpy sıpattaǵy transfertterdi josparlaý kezinde júrgiziletin jumysty eskere otyryp, óńirler jergilikti bıýdjettiń barlyq deńgeıindegi óńirlik standarttar júıesi kórsetkishterine negizdeledi, — dedi Serik Jumanǵarın Májiliste ótken Úkimet saǵatynda.

Onyń aıtýynsha, jergilikti bıýdjetter bazasyna buryn nysanaly damý transfertteri jáne aǵymdaǵy transfertter esebinen qarjylandyrylǵan respýblıkalyq bıýdjettiń shyǵys baǵyttary engiziledi. 

— Bul degenimiz sýmen jabdyqtaý jáne sý burý obektileri, ınjenerlik-kommýnıkatsııalyq jáne kólik ınfraqurylymy, taǵy da basqa. Atalǵan shyǵystardyń maqsatty sıpatyn saqtap qalý jáne qarajattyń basym emes salalarǵa bólinip ketýin boldyrmaý maqsatynda, olar naqty maqsaty kórsetilip, zańǵa jeke qosymsha retinde engiziledi. Olardy josparlaýdy tıisti salalyq memlekettik organdar júzege asyrady. Baqylaý jáne baǵalaý jumystaryn tekserý komıssııalary júrgizedi. Munda biz «Aýyl — el besigi», «Qalalardyń shetki aýmaqtaryn damytý» shaǵyn jáne monoqalalarda bıýdjettik ınvestıtsııalyq jobalardy iske asyrý taǵy sol sııaqty túrli salalyq baǵdarlamalar sheńberinde eldi mekenderdegi jobalardy, is-sharalardy núktelik qarjylandyrýdan alshaqtaıtynymyzdy túsinýimiz kerek. Osy baǵdarlamalar kúshin joıýǵa qoıylady, — dep túsindirdi Úkimet basshysynyń orynbasary.

Buǵan deıin habarlaǵanymyzdaı 2026 jyldan bastap turaqty kiristiń 40% jergilikti bıýdjetke jınalady. 

Sondaı-aq Úkimet saǵaty barysynda el bıýdjetiniń úsh donor óńiri ataldy.