«Aýyl — el besigi» aýyldyq aýmaqtardyń damýyn qamtamasyz ete almady — senator
ASTANA. KAZINFORM — «Aýyl — el besigi» jobasy 6 jylǵa jýyq ýaqyt ishinde aýyldyq aýmaqtardyń áleýmettik-ekonomıkalyq keshendi damýyn tolyq kólemde qamtamasyz ete almady. Bul máseleni búgin Senattyń jalpy otyrysynda senator Olga Býlavkına depýtattyq saýalynda kóterdi.
Depýtattyń aıtýynsha, baǵdarlamaǵa 875 mlrd teńge bólingen jáne áleýmettik nysandardan bastap ınjenerlik ınfraqurylymǵa deıingi 6,6 myńnan astam joba iske asyrylǵan. Alaıda, senatordyń pikirinshe, qarjylandyrý kólemi men sapa jáne jergilikti jaýapkershilik bir-birinen alshaq jatyr. Bul bıýdjettiń tıimdi ıgerilgenine kúmán keltiredi.
— Júzdegen aýyl keshendi aýmaqtyq josparlaýdyń bolmaýyna baılanysty áli kúnge deıin negizgi áleýmettik ıgilikter men ınfraqurylymǵa qol jetkize almaı ómir súrip keledi. Aýyldyq elektr taratý jelileriniń kópshiligi 70-80%-ǵa tozyp ketken. Sý jelileriniń ábden tozýy sý shyǵynyna ákeledi. Sol sebepti shaǵyn jáne orta bızneske jańa qýat qosý múmkin emes. Al tozǵan ınfraqurylymdy jıi jóndeýge jumsalǵan shyǵyn halyq pen kásipkerler úshin tarıfte kórsetiledi. Myńnan astam aýylda turaqty ınternet baılanysy joq, al eldi mekenderdiń 58%-yna talshyqty-optıkalyq baılanys jelisi qajet. Bul aýyl turǵyndarynyń tsıfrlyq qyzmetterge qoljetimdiliginiń shektelgenin kórsetedi, — dep atap ótti Olga Býlavkına.
Senator sonymen qatar aýqymdy ınvestıtsııaǵa qaramastan, aýyldyń damýy birkelki emestigin, shaǵyn sharýashylyqtar qazirgi zamanǵy tehnologııanyń jetispeýshiligi jáne ınfraqurylymnyń álsizdigi jáne satyp alýshyǵa táýeldilikten áli de qutyla almaı otyrǵanyn atap ótti.
— «Aýyl — el besigi» jobasy 6 jylǵa jýyq ýaqyt ishinde aýyldyq aýmaqtardyń áleýmettik-ekonomıkalyq keshendi damýyn tolyq kólemde qamtamasyz ete almady. Infraqurylymdy damytýǵa salynǵan mıllıardtaǵan qarjy aýylda myqty agroónerkásip óndirisi men sapaly jumys oryndarynyń qalyptasýyna alyp kelmedi. Osyǵan baılanysty uzaq merzimdi áleýmettik-ekonomıka salasyndaǵy naqty ólshenetin kórsetkishterdi eskere otyryp, qazaqstandyqtardyń ómir sapasyna naqty áserin baǵalaýǵa baǵyttalǵan mekemearalyq aıqyn baqylaý qajet. Bul joba aýyldaǵy ınfraqurylymdyq ózgerister saıasatynda ǵana emes, sonymen qatar ıdeologııa men ekonomıka bir topta jumys isteıtin birtutas modelge aınalýy kerek, — dedi Olga Býlavkına.
Aıta ketelik aýyldarda shaǵyn ónerkásiptik alańdar qurylatyny týraly jazǵan edik.