«Aýyl – el besigi»: Qyzylorda oblysynda eki jańa sport kesheni el ıgiligine berildi
QYZYLORDA. KAZINFORM - Búgin Qyzylorda oblysynyń ákimi Murat Ergeshbaevtyń Qazaly aýdanyna jumys sapary barysynda aýdan turǵyndary úshin mańyzdy eki sporttyq nysan – Qojabaqy aýylynda jáne Áıteke bı kentinde salynǵan jańa dene shynyqtyrý-saýyqtyrý keshenderi paıdalanýǵa berildi.
Aldymen Qojabaqy aýylyndaǵy jańa dene shynyqtyrý-saýyqtyrý kesheniniń ashylý rásimine qatysqan aımaq basshysy turǵyndardy quttyqtap, eldi mekenderde kásibı jáne buqaralyq sportty damytýdyń mańyzdylyǵyn atap ótti.
-Memleket basshysy Qasym-Jomart Kemeluly: «Aýyl – bizdiń altyn besigimiz. Aýyldaǵy tirshilik sapasyn jaqsartpaı, jalpyulttyq damýdy elestetý múmkin emes» degen bolatyn.
Búgin Ózderińizben birge «Aýyl – el besigi» baǵdarlamasy aıasynda Qojabaqy aýylynda salynǵan jańa dene shynyqtyrý-saýyqtyrý keshenin ashýǵa jınaldyq. Bir kúnde 100 adamdy qabyldaýǵa qaýqarly zamanaýı keshende boks, grek-rım kúresi, voleıbol, fýtbol jáne basketbol syndy sport túrlerimen aınalysýǵa bolady. Bul aýyl jastarynyń buqaralyq sportpen turaqty shuǵyldanýyna, salaýatty ómir saltyn qalyptastyrýǵa, bolashaq chempıondardy tárbıeleýge jol ashady dep senemin, - dedi oblys ákimi.
Jumys sapary aıasynda oblys ákimi Aqtan batyr, Janqoja batyr, Bekarystan bı, Maıdakól jáne Ú.Túktibaev eldi mekenderiniń turǵyndarymen kezdesip, halyqtyń usynys-pikirlerin tyńdady.
Sonymen qatar, osy kúni Áıteke bı kentinde de «Aýyl – el besigi» baǵdarlamasy aıasynda salynǵan jańa dene shynyqtyrý-saýyqtyrý kesheni paıdalanýǵa berildi.
Saltanatty rásimde sóz sóılegen oblys ákimi óńirde kásibı jáne buqaralyq sportty damytýǵa erekshe kóńil bólinip otyrǵanyn atap ótti.
-Memleket basshysynyń qoldaýymen búgingi paıdalanýǵa berilip otyrǵan bul keshende qazaq kúresi, dzıýdo, ústel tennısi, voleıbol, fýtbol, gandbol jáne basketbol sekildi sport túrlerimen aınalysýǵa barlyq jaǵdaı jasalǵan. Nysan bir kúnde 150 sportshyny qabyldaı alady. Bul jerden elimizdiń abyroıyn halyqaralyq arenalarda asqaqtatatyn chempıondar tárbıelenip shyǵady dep senemiz, – dedi aımaq basshysy.
Aıta keteıik, Memleket basshysynyń, Úkimettiń qoldaýymen 2022 jyldan beri óńirde 200-den astam áleýmettik nysan boı kóterdi. Onyń 27-si - sport kesheni, búginde el ıgiligine aınaldy. Budan bólek, Qyzylorda qalasynda 11 myń oryndyq «Qaısar Arena» stadıony, «Tennıs ortalyǵy» , Inklıýzıvti sport kesheni paıdalanýǵa berildi.
«Qazaqstan halqyna» qoǵamdyq qorynyń qoldaýymen Shıeli, Jalaǵash aýdandarynda jańa sport keshenderi ashyldy.
Búginde oblys ortalyǵynda «Qyzylorda Arena» kópbeıindi sport kesheniniń, «Qaısar» fýtbol klýby akademııasynyń qurylysy qarqyn aldy.
