Aýyl – el besigi: BQO-da 13,3 mlrd teńgege 60 joba júzege asyp jatyr
«Aýyl – el besigi» baǵdarlamasy aıasynda Batys Qazaqstan oblysynda jalpy quny 13,3 mlrd teńge bolatyn 60 joba júzege asyp jatyr, dep habarlaıdy Kazinform.
BQO qarjy basqarmasynyń basshysy Nurlan Esenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bul jobalar 109,5 myń adam (barlyq aýyl turǵyndarynyń 34,9 paıyzy) turatyn 34 perspektıvti aýylda qolǵa alyndy.
Nurlan Muhıtulynyń sózine qaraǵanda, sonyń ishinde kólik ınfraqurylymyn damytý baǵytynda 29 joba (7,8 mlrd) aıasynda 9,3 shaqyrym jol qurylysy men 90 shaqyrym joldy kúrdeli jóndeý josparlandy.
Kúni búgin 3 joba aıaqtalyp, 16 shaqyrym jol retke keltirildi.
Óńirde aýyl halqynyń turmys sapasyn arttyrý maqsatynda áleýmettik salaǵa da aıryqsha kóńil bólinip keledi. Munda 5,4 mlrd teńgege 28 jobany júzege asyrý kózdelgen.
Atap aıtqanda, 2022 jyldan aýyspaly 9 mektep pen 1 qosymsha bilim berý ortalyǵyn kúrdeli jóndeý júrgizilip, sonyń altaýynda jumys óz máresine jetti.
Densaýlyq saqtaý salasynda Jánibek aýdany Talov, Kaztalov aýdany Qaraoba aýyldarynda dárigerlik ambýlatorııa kúrdeli jóndeýden ótkizildi.
Taǵy tórteýinde jumys jalǵasýda, Terekti aýdany Terekti aýdanynda aýdandyq emhana salynyp jatyr.
Mádenıet salasynda 3 aýyldyq mádenıet úıin kúrdeli jóndeý jáne jeti ǵımaratty jańadan salý josparlanǵan.
Sonyń ishinde Aqjaıyq aýdany Mergen aýylynda mádenıet úıi kúrdeli jóndeldi.
Abattandyrý jáne gazben qamtý salasynda 0,1 mlrd teńgege Aqjaıyq aýdanynda Chapaev jáne Taıpaq aýyldarynyń kóshelerin jaryqtandyrý aıaqtaldy.
Taǵy bir aýylda áleýmettik nysandar gazǵa qosylmaqshy.
«Osylardyń ishinde iri jobalarǵa toqtalar bolsaq, aldymen Terekti aýdany Terekti aýylyndaǵy aýdandyq emhana ǵımaraty aýyzǵa iligedi. Sondaı-aq Bókeı ordasy Bısen aýylynda 300 oryndyq mádenıet úıi eńseli ǵımaratqa aınalmaqshy. Báıterek aýdany Şapov, Kaztalov aýdany Qaıyńdy, Jańaqala aýdany Qyrqopa aýyldarynda da osyndaı mádenıet úıleri salynýda» dedi N.Esenǵalıev.
Aıta keteıik, 2019-2022 jyldary Batys Qazaqstanda atalmysh baǵdarlama aıasynda 19,5 mlrd teńge bólinip, 144 joba júzege asyrylyp, 179,6 myń adam (aýyl turǵyndarynyń 57,3 paıyzy) turatyn 54 perspektıvti aýyl qamtyldy.
