«Aýyl - el besigi»: 771 aýylda 194 mlrd teńgeniń jobasy iske asyrylǵan

ASTANA. KAZINFORM - Qazaqstan Respýblıkasynyń Ulttyq ekonomıka vıtse-mınıstri Baýyrjan Omarbekov Qyzylorda oblysynda ótken respýblıkalyq «Bıznestiń áleýmettik jaýapkershiligi – aýyldy damytýdyń negizi» atty semınarǵa qatysty.

B. Omarbekov óz sózinde aýyldyq aýmaqtardy damytý saıasatyna Úkimet tarapynan erekshe kóńil bólinip jatqanyn atap ótti.

"Memleket basshysynyń Jarlyǵyna sáıkes qabyldanyp, iske asyrylyp jatqan Aýyldyq aýmaqtardy damytýdyń 2023-2027 jyldarǵa arnalǵan tujyrymdamasy bar.

«Aýyl - el besigi» baǵdarlamasy aıasynda 194 mlrd teńge somasyna 771 aýylda 1,8 myń joba iske asyryldy.

Atalmysh baǵdarlama iske asyrylǵan jyldan bastap respýblıkalyq bıýdjetten qarjylandyrý kólemi 6 esege ulǵaıǵan", - dedi mınıstr.

B. Omarbekov baǵdarlama boıynsha bıylǵy jyly respýblıkalyq bıýdjetten 179 mlrd teńge bólinip, 500-den astam aýylda 1,4 myń jobany iske asyrý josparlanǵanyn aıtty.

Budan bólek, 2023 jyly 113 mlrd teńgege 4,9 myń sýmen jabdyqtaý jáne sý burý obektileri salynyp, 85 alǵashqy medıtsınalyq-sanıtarlyq kómek obektileri qurylǵanyn atap ótti.

«Aýyl amanaty» jobasy aıasynda 79 mlrd teńgege 12,7 myń jeńildetilgen shaǵyn nesıe berilgen.

Sonymen qatar aýyldyq jerge jas mamandardy tartý maqsatynda «Dıplommen aýylǵa» jobasy boıynsha bıýdjettik kredıt mólsheri 1 500-den (5,4 mln. teńge) 2 500 aılyq eseptik kórsetkishke (9,2 mln. teńge) deıin ulǵaıtylǵan.

«Aǵymdaǵy jyly joba boıynsha 25 mlrd teńge qarastyrylǵan, bul 3,1 myńǵa jýyq mamandy turǵyn úımen qamtamasyz etýge múmkindik beredi», - dep atap ótti vıtse-mınıstr.