Aýyl balasynyń talanty aýylda qalyp qoımaýy kerek — Quryltaı depýtaty

— Memleket basshysynyń tapsyrmasymen elimizde balalardyń qosymsha bilimge qoljetimdiligin keńeıtý boıynsha júıeli jumys júrgizilip keledi. 2025 jyldan bastap qosymsha bilim berýdi qarjylandyrý júıesi kezeń-kezeńimen engizilýde. Bul másele «Aýyl» partııasynyń saılaýaldy baǵdarlamasyndaǵy ustanymdarmen de tikeleı úndesedi. Baǵdarlamada elimizdiń barlyq óńirinde azamattardyń bilim alýyna, damýyna jáne óz qabiletin iske asyrýyna teń múmkindik jasaý negizgi basymdyqtardyń biri retinde aıqyndalǵan. Osyǵan baılanysty búgin «Aýyl» partııasy fraktsııasy atynan aýyl balalarynyń qosymsha bilimge qoljetimdiligi máselesin kóteremiz, — dedi ol.

Depýtattyń aıtýynsha, Oqý-aǵartý mınıstrliginiń deregine sáıkes, 2025 jyldyń qorytyndysynda elimizde balalardy qosymsha bilimmen qamtý deńgeıi 90 paıyzǵa jetip, 3,5 mıllıon balany qurady. Onyń ishinde 2,2 mıllıon bala tegin úıirmeler men sektsııalarǵa qatysady. Qosymsha bilim berý uıymdarynyń sany 2 myńnan asty.

— Bul — jaqsy kórsetkish. Alaıda jalpy statıstıkanyń artynda aýyl men qala balalarynyń naqty múmkindikterindegi aıyrmashylyq qalyp otyr. Búginde elimizde 3,9 mıllıonnan astam oqýshy bilim alady. Aýyl balasynyń sportpen, mýzykamen, ónermen, robototehnıkamen, IT jáne tehnıkalyq shyǵarmashylyqpen aınalysý múmkindigi qaladaǵy qatarlasyna qaraǵanda áli de shekteýli. Másele tek úıirmeniń bar-joǵynda emes. Másele — tańdaý múmkindiginde. Qaladaǵy bala óz qyzyǵýshylyǵyna qaraı birneshe baǵyttyń birin tańdaı alady. Al shaǵyn jáne shalǵaı aýyldarda tańdaý kóbine mekteptegi sanaýly úıirmemen shekteledi. Mınıstrlik sońǵy úsh jylda aýyldyq jerlerde 1251 komıýnıtı-ortalyq ashylǵanyn habarlady. Bul jumysty qoldaımyz. Endigi mindet — osy tájirıbeni keńeıtip, árbir aýyl balasyna naqty múmkindik berý. Balanyń múmkindigi onyń mekenjaıyna baılanysty bolmaýy tıis, — dedi Quryltaı depýtaty.

Osyǵan baılanysty Shahmardan Baımanov «Aýyl» partııasynyń fraktsııasy atynan mynadaı sharalar usynady:

— Aýyl men qala boıynsha qosymsha bilimniń qoljetimdiligin bólek eseptep, tek qamtylǵan balalar sanyn emes, olarǵa qoljetimdi úıirmeler men baǵyttardyń sanyn da baǵalaý qajet.
— «Bir aýyl — birneshe múmkindik» qaǵıdatyn engizý, jańa ǵımarat salýdy kútpeı, mektepterdi, mádenıet úılerin, kitaphanalar men sport nysandaryn sabaqtan keıin qosymsha bilim berý úshin keńinen paıdalaný kerek.
— Shaǵyn jáne shalǵaı aýyldarǵa mobıldi qosymsha bilim berý júıesin engizý qajet. Arnaıy jabdyqtalǵan kóshpeli toptar birneshe aýyldy turaqty kestemen qamtı alady.
— Aýylda jumys isteıtin qosymsha bilim pedagogteri men jattyqtyrýshylardy, mýzyka, óner, IT, robototehnıka jáne tehnıkalyq shyǵarmashylyq mamandaryn arnaıy yntalandyrý tetigin qarastyrý qajet. Óıtkeni ınfraqurylym bolǵanymen, maman bolmasa, úıirme jumys istemeıdi.
— Qosymsha bilim berýdiń biryńǵaı memlekettik tapsyrysy aıasynda aýyldyq jáne shalǵaı eldi mekender úshin aýmaqtyq túzetý koeffıtsıentin engizý kerek. Ol aýyldyń shalǵaılyǵyn, balalar sanyn, toptardyń naqty tolymdylyǵyn, mamandardy tartý jáne kólik-logıstıkalyq shyǵyndardy eskerýi tıis.

— Qosymsha bilim — balanyń bos ýaqytyn uıymdastyrý ǵana emes. Bul — onyń qabiletin ashý, ózine senimdiligin qalyptastyrý jáne bolashaǵyn tańdaýǵa múmkindik berý. Aýyl balasynyń talanty aýylda qalyp qoımaýy kerek. Osyǵan baılanysty Oqý-aǵartý mınıstrliginen atalǵan usynystardy qarastyryp, 2030 jylǵa deıin árbir aýyl balasyna keminde bir tegin úıirme nemese sektsııaǵa naqty qoljetimdilikti qamtamasyz etetin keshendi jospar ázirleýdi suraımyz. Qala balasyna qandaı múmkindik berilse, aýyl balasyna da sondaı múmkindik berilýi tıis. Bul — bilimdegi teń múmkindik. Bul — aýyldyń bolashaǵyna salynǵan ınvestıtsııa, — dedi ol.

Buǵan deıin Quryltaı balalardyń áleýmettik jelige tirkelýine shekteý qoıý tetigin naqtylaý máselesin kótergenin jazǵan edik.