Aýyl balalarynyń múmkindigi qala oqýshylarynan kem emes – Tarıh aǵaı
ASTANA. KAZINFORM – Jastardyń kóbi úlken múmkindikti qaladan izdegenimen, týǵan aýylynda qalyp, jas urpaqtyń bilim alýyna úles qosýdy tańdaǵandar da bar. Solardyń biri – áleýmettik jelide «Tarıh aǵaı» atymen tanylǵan Beksultan Muratbekuly. Jambyl oblysy Shý aýdany Tóle bı aýylynda eńbek etetin jas ustaz aýyl mektebinde de sapaly bilim berýge barlyq múmkindik bar ekenin aıtady.
Beksultan Muratbekuly – Ermuhan Bekmahanov atyndaǵy mektep-gımnazııanyń tarıh páni muǵalimi. Ustazdyq joldy bala kezinen armandaǵan ol shákirtteriniń bolashaǵyna úles qosýdy basty maqsaty sanaıdy. Qalada bilim alyp, magıstratýrany úzdik támamdaǵan jas maman týǵan aýylyna oralyp, eńbek etýdi jón kórgen.
Onyń aıtýynsha, buryn úlken jetistikke jetý úshin mindetti túrde úlken qalaǵa barý kerek degen taptaýryn bar. Alaıda qazirgi múmkindikter aýylda júrip te kásibı damýǵa, bıik belesterdi baǵyndyrýǵa jol ashady.
– Ózim de aýyldan shyqqan qarapaıym qazaqtyń balasymyn. Buryn úlken jetistikke jetý úshin qalaǵa kóshý kerek degen kózqaras boldy. Qazir zaman ózgerdi. Aýylda júrip te úlken jetistikterge jetýge bolady. Men osy túsinikti ózgertip, jastarǵa aýylda qalyp ta óz maqsatyńa jete alatynyńdy kórsetkim keledi, – deıdi Beksultan Muratbekuly Jibek Joly telearnasyndaǵy «Búgin.LIVE» baǵdarlamasynda.
Jas ustaz aýyl men qala mektepterindegi bilim sapasyn bir-birine qarsy qoıýǵa bolmaıtynyn aıtady. Onyń pikirinshe, qazir aýyl mektepterinde de zamanaýı bilim berý quraldary men tsıfrlyq platformalardy paıdalanýǵa múmkindik bar. Eń bastysy – muǵalimniń sol múmkindikti qanshalyqty tıimdi qoldana bilýi.
– Aýyl balalarynyń bilimi qala oqýshylarynan kem degen pikirmen kelispeımin. Qalada bar múmkindik aýylda da bar. Qazir sabaqty túrli oıyn, ádis-tásilder men tsıfrlyq platformalar arqyly qyzyqty ótkizýge bolady. Ásirese qazirgi balalardyń nazaryn aýdarý úshin sabaqty tartymdy etip uıymdastyrý mańyzdy, – deıdi ol.
«Tarıh aǵaıdyń» áleýmettik jelidegi beınerolıkterinen de osy ustanymyn ańǵarýǵa bolady. Ol sabaq barysynda oqýshylardy túrli oıyndar men ınteraktıvti tapsyrmalarǵa tartyp, tarıh pánin qyzyqty formatta túsindirýge tyrysady.
Al aýyl mektebinde jumys isteýdiń ózindik artyqshylyqtary bar. Shaǵyn ortada muǵalim oqýshylaryn jaqsy tanyp, olardyń otbasylyq jaǵdaıynan da habardar bolady. Bul ustaz ben shákirt arasyndaǵy senimdi qarym-qatynasty qalyptastyrýǵa kómektesedi.
– Aýyldyń bir artyqshylyǵy – munda bári bir-birin tanıdy. Oqýshylaryńdy da, ata-anasyn da, otbasylyq jaǵdaıyn da jaqsy bilesiń. Sonyń arqasynda balamen jaqyn qarym-qatynas ornatyp, onyń júregine jol tabý jeńildeıdi. Bul ustazdyq jumysta óte mańyzdy, – deıdi ol.
Áleýmettik jelide «Tarıh aǵaı» degen atpen tanylýy da bastapqyda arnaıy josparlanbaǵan. Qarapaıym ári este qalatyn ataý ýaqyt óte kele jas muǵalimniń ózindik beınesine aınalǵan. Búginde ol osy ataýmen aýyl mektebiniń tynys-tirshiligin, sabaq barysyn jáne oqýshylarymen jumys isteý tásilderin kópshilikke kórsetip júr.
Beksultan Muratbekuly úshin aýylda ustaz bolý – týǵan jerdiń damýyna qosqan úlesi. Onyń aıtýynsha, jas mamandardyń aýylda eńbek etýi aýyl balalarynyń da úlken maqsat qoıyp, óz múmkindigine senýine jol ashady.
Aıta keteıik, buǵan deıin, tsıfrlyq dáýirdegi ustaz, ınnovator jaıly jazǵan edik.
