Aýyl balalary qashanǵy shaǵyn alańnyń shańyn jutady
ASTANA. KAZINFORM – Keıingi jyldary aýyldy aıaqqa turǵyzý maqsatynda túrli memlekettik baǵdarlamalar qabyldanyp jatyr. Áıtpese, jastardyń barlyǵy derlik qalaǵa aǵylyp, qara shańyraqty kúzetip zeınetkerler qalǵany jasyryn emes. Aýyldaǵy aǵaıynnyń turaqtap qalýyna turaqty jumyspen qatar, sporttyq nysandardyń salynýy da mańyzdy ekeni anyq. Bul saýaldy QR Týrızm jáne sport mınıstrine joldadyq.
«Bıyl aýyldyq jerlerde 133 sport nysanyn salý (rekonstrýktsııalaý) jáne 43 sport nysandy jóndeý (aǵymdaǵy jáne kúrdeli) josparlanyp otyr. Qazirgi ýaqytta aýylda 14 458 sport obektisi bar», - delingen mınıstrlik ókiliniń agenttik tilshisine bergen jaýabynda.
Aýyl turǵyndaryn áńgimege tartsań, aýyl balalarynyń qazaq kúresine, boksqa qyzyǵýshylyǵy bar ekenin alǵa tartady. Biraq, arnaıy jattyǵatyn jer joq. Amalsyzdan mekteptiń sport zalyn shańdatýǵa májbúr.
«Baıqaımyn, kóp aýylda shaǵyn fýtbol alańdary salynyp jatyr. Keıbiri demeýshilik esebinen boı kóteredi. Sport nysany degen uǵym tek shaǵyn fýtbol alańyna qatysty emes qoı. Nege shaǵyn bolsa da kúres, boksqa arnalǵan jattyǵý nysandaryn turǵyzbasqa? Tańnan keshke deıin aýyl balalary dop tepkenge buqaralyq sportty damytyp jatyrmyz deý durys emes», - deıdi Pavlodar oblysy Birlik aýylynyń turǵyny Erlan Jakeev.
Áleýmettik jelilerden keıbir shaǵyn fýtbol alańdarynyń kóp uzamaı toz-tozy shyqqanyn ańǵarýǵa bolady. Ony jóndeýge qarajattyń jedel bólinýi ekitalaı. Sebebi, ózge aýyldar «shaǵyn alań salyp berer» dep kezek kútip tur.
«Shaǵyn fýtbol alańyna aýyldyń jigitteri bolyp kútim jasaımyz. Kóktemde qorshaýdyń ajyraǵan symdaryn dánekerleımiz. Qarajat jınap, qaqpaǵa tor, dop satyp alamyz. Aýyl ákimdigi de qural-jabdyqtarmen qamtamasyz etip turady. Dese de, alańnyń jabyndysyn qalpyna keltirý bizdiń qoldan kele qoımas. Buǵan ákimdik kómekteser degen oıdamyz. Al, qalǵan sharýany aýyldyń azamattary shama-sharqynsha rettep jatyrmyz», - deıdi Birliktiń taǵy bir turǵyny Samat Álimbetov.
Búginde kóptegen aýylda shaǵyn fýtbol alańy bar. Sapasy jaıly – bólek áńgime. Bir qýanarlyǵy, aýyldyń kishi-jasy kúni-túni alańda dop teýip, bos ýaqytyn tıimdi ótkizedi. Al ókinishtisi sol, turǵyndar ózge de sport nysandarynyń salynǵanyn qalaıdy. Árıne, halqy az aýylǵa alyp ǵımarat kerek emes. Shaǵyn bolsa da jetkilikti. Buǵan QR Týrızm jáne sport mınıstri ne der eken?
