Aýyl-aýdandardaǵy mýzeılerdiń jańa eksponattar alýǵa múmkindigi joq
ASTANA. KAZINFORM — Bul týraly Jibek Joly telearnasyna bergen suqbatynda Ulttyq mýzeı dırektory Berik Ábdiǵalıuly aıtty.
Ulttyq mýzeı basshysynyń aıtýynsha, aýyl-aýdandardaǵy mýzeılerdiń kúıi áli kúnge deıin keńes zamanyndaǵydaı. Ǵımarattardyń tozǵany sonshalyq, tipti keıbiriniń shatyrynan sý aǵyp jatady. Jańa eksponattarmen de tolyqtyrylmaıdy.
- Birinshiden, bul qarajattyń joqtyǵynan, ekinshiden mamandar jetispeıdi. Aýyl-aýdandaǵy mýzeılerge barsańyz, áli kúnge deıin sol kúıinde, tek sýretterin aýystyra salǵan. Esh ózgeris joq. Eksponat satyp alýǵa da múmkindik joq. Qarajat jetispeıdi. Qarajat bólingenniń ózinde reekspozıtsııa jasaıtyn maman joq, - dedi Berik Ábdiǵalı.
Qazir bul máseleni sheshý úshin mamandardy shetelde oqytý baǵdarlamasy júrip jatyr. Osy oraıda, mýzeı isinde tájirbıesi bar Túrkııa, Reseı, Ózbekstan, Bolgarııa syndy eldermen kelisim jasalǵan.
Aıta keteıik, Ulttyq mýzeı Italııadaǵy restavratsııa ınstıtýtymen áriptestik ornatpaq.