«Aýyl amanaty» jobasy aıasynda jeńildetilgen kredıtterdi berý ІІ-toqsanda bastalady

ASTANA. KAZINFORM — «Aýyl amanaty» jobasy aıasynda jeńildetilgen kredıtterdi berý ІІ-toqsanda bastalady. Bul týraly Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.

— «Aýyl amanaty» jobasy Memleket basshysynyń tapsyrmasyna sáıkes 2023 jyldan bastap júzege asyrylýda. 2023-2024 jyldary aralyǵynda jobany júzege asyrý úshin respýblıkalyq bıýdjetten 120 mlrd teńge kóleminde qarjy bólindi. 2025 jylǵa 50 mlrd teńge qarjy qarastyrylyp, qarjylandyrý josparyna sáıkes jeńildetilgen kredıtterdi berý osy jyldyń ekinshi toqsanynyń aıaǵyna josparlanýda, — dedi Úkimet basshysy jaýabynda.

Onyń atap ótýinshe, joba aýyldyq eldi mekender turǵyndarynyń tabysyn arttyrýǵa baǵyttalǵan negizgi quraldardyń biri.

— Bul rette búginde jobany iske asyrý quzirettiligi Aýyl sharýashylyǵy mınıstrliginen Ulttyq ekonomıka mınıstrligine berilýine baılanysty jobany ózektendirý maqsatynda jańa tásilderdi ázirleý jáne aýyldyq aýmaqtardy keshendi damytýǵa arnalǵan memlekettik qoldaý sharalaryn birlesip júzege asyrý boıynsha jumystar júrgizilip jatyr, — dedi Oljas Bektenov.

Aıta keteıik, Ulttyq ekonomıka mınıstrligi «Aýyl amanaty» baǵdarlamasyn iske asyrýdyń jańa modelin ázirlep jatyr. Baǵdarlama aýyldaǵy kásipkerlikti damytýdy kózdeıdi. Qoldaý tetiginiń ishinde 2,5%-ben shaǵyn nesıe men lızıng bar. Qazir mınıstrlik skrınıng arqyly eldi mekenderdiń mamandanýyn anyqtaý tásilin, erejelerdi jańarpaq.