«Aýyl amanaty»: Munaıshylar sharýa ónimin satyp almaq
ORAL. KAZINFORM – «Aýyl amanaty» jobasy aýyldaǵy aǵaıynnyń tabysyn arttyryp qana qoımaı, iri kásiporyndarǵa qolaıly jaǵdaı týǵyzýǵa sep bola alady. Munyń aıqyn mysaly retinde Batys Qazaqstan oblysynda qol qoıylǵan kelisimdi keltirýge bolar.
Aýyl sharýashylyǵy taýarlaryn óndirýge bel býǵan azamattar úshin eń negizgi máselelerdiń biri — ónimin satý jolyn retteý ekeni anyq. Al iri kásiporyndarǵa sapaly ári taza azyq-túlik satyp alý mańyzdy. Batys Qazaqstan oblysynda ortaq múdde resmı qujatpen bekitildi. Aımaq ákimdigi men Karachaganak Petroleum Operating kompanııasy arasynda jergilikti taýar óndirýshilerdi qoldaý jónindegi memorandýmǵa qol qoıyldy.
Oblys ákimi Narıman Tóreǵalıev bul kelisim jergilikti sharýalar úshin qolaıly bolaryn atap ótti.
«Memleket basshysy aýyldyq jerlerdegi kásip ıelerine barynsha kóńil bólý qajettigin aıtyp ótken bolatyn. Búgingi kelisim „Aýyl amanaty“ jobasy aıasynda kásip ashyp, sharýasyn dóńgeletip otyrǵan aýyldyqtar úshin bul jaqsy múmkindik. Aýyldaǵy azamattardyń sapaly taýarlaryna taǵy bir iri ári turaqty tutynýshy tabyldy deýge bolady», — dedi aımaq basshysy.
Karachaganak Petroleum Operating kompanııasy bas dırektorynyń orynbasary Muhtar Mankeev kelisim kásiporynǵa da paıdaly bolaryna basa mán berdi.
«Keńse, zaýyttarymyz Batys Qazaqstan óńirinde turǵandyqtan, jergilikti sapaly ónimderdi paıdalaný biz úshin tıimdi. Aýyl sharýashylyǵy taýar óndirýshilerimen tyǵyz qarym-qatynasta jumys isteýge ázirmiz», — dedi ol.
Batys óńirde logıstıka máselesi ótkir tur. Eldimekenderdiń bir-birinen qashyq ornalasýy taýar tasymaldaý kezinde baǵaǵa áser etedi. Bul máseleni sheshýge ortalyq operator retinde «Aq Jaıyq» áleýmettik kásipkerlik korporatsııasy qatyspaq. Jospar boıynsha, olar sharýalardy túrli qoldaý baǵdarlamalary arqyly qajetti tehnıkamen qamtyp, ónim tasymaldaý kezinde demeý bolmaq.
Aımaqqa jumys saparymen kelgen QR Premer-Mınıstriniń orynbasary Tamara Dúısenova memorandýmnyń mańyzdylyǵyna toqtaldy.
«Bul kelisimnen barlyq taraptar utady dep sanaımyn. Bizdiń elimizde iri óndiris oshaqtary kóp. Barlyǵynda da sapaly azyq-túlikke degen suranystary bar. Sol sebepti búgingi tájirıbe ózge kásiporyndarǵa úlgi bolaryna senimdimin», — dep atap ótti Tamara Dúısenova.
