«Aýyl amanaty» baǵdarlamasynyń arqasynda qansha jumys orny ashyldy

ASTANA. KAZINFORM – «Aýyl amanaty» baǵdarlamasy aıasynda óńirlerde 600-ge jýyq aýyl sharýashylyǵy kooperatıvi quryldy. Bul týraly Májilis depýtattarynyń saýalyna Premer-Mınıstrdiń orynbasary Serik Jumanǵarınniń jaýabynda aıtylǵan.

- 2023 jyly Memleket basshysynyń tapsyrmasyna sáıkes «Aýyl amanaty» aýyl halqynyń tabysyn arttyrý baǵdarlamasyn iske asyrý bastaldy jáne ony iske asyrý úshin 2023-2024 jyldary aralyǵynda respýblıkalyq bıýdjetten jalpy sommasy 120 mlrd teńge kóleminde qarjy bólindi. Búgingi tańda bólingen qarajat esebinen 18,4 myńnan astam jumys ornyn qura otyryp, shamamen 111,1 mlrd teńge somaǵa 16,6 myńnan astam shaǵyn kredıt berildi, - dedi vıtse-premer jaýabynda. 

Osy oraıda ol baǵdarlamanyń aýyl halqynyń tabysyn arttyrýdan basqa maqsattarynyń biri jeke sharýa qojalyqtary men sharýa jáne fermer qojalyqtaryn, sondaı-aq qaıta óńdeý kásiporyndaryn biriktiretin aýyl sharýashylyǵy kooperatıvterin damytý bolǵanyn aıtady.

- Baǵdarlamany iske asyrý aıasynda óńirlerde 600-ge jýyq aýyl sharýashylyǵy kooperatıvi quryldy. Onyń ishinde 12,7 mlrd teńge somasyna 561 aýyl sharýashylyǵy kooperatıvi (2023 jyly 339 AShK – 7,2 mlrd teńge, 2024 jyly 222 AShK – 5,5 mlrd teńge) qarjylandyryldy, - dedi Serik Jumanǵarın.

Aıta keteıik, Ulttyq ekonomıka mınıstrligi «Aýyl amanaty» baǵdarlamasyn iske asyrýdyń jańa modelin ázirlep jatyr.

Baǵdarlama aýyldaǵy kásipkerlikti damytýdy kózdeıdi. Qoldaý tetiginiń ishinde 2,5%-ben shaǵyn nesıe men lızıng bar. Qazir mınıstrlik skrınıng arqyly eldi mekenderdiń mamandanýyn anyqtaý tásilin, erejelerdi jańartýda.