«Aýyl amanaty» baǵdarlamasy: kimder 34,6 mln teńgege deıin nesıe ala alady
ASTANA. KAZINFORM - Qazaqstanda aýyl turǵyndarynyń tabysyn arttyrýǵa jáne aýyldar men shaǵyn qalalarda kásipkerlikti damytýǵa baǵyttalǵan «Aýyl amanaty» baǵdarlamasy júzege asyrylyp jatyr, dep habarlaıdy Úkimettiń baspasóz qyzmeti.
Negizgi qural – jeńildikti mıkrokredıt berý, sonyń arqasynda turǵyndar óz isin ashyp, jumys istep turǵan óndirisin keńeıtip, kooperatıvterge birigip, turǵylyqty jeri boıynsha jańa jumys oryndaryn qura alady.
Qaryzdar jyldyq 2,5% mólsherleme boıynsha beriledi: aýyl sharýashylyǵy emes baǵyttar úshin 5 jylǵa deıingi jáne aýyl sharýashylyǵy jáne ónimdi qaıta óńdeý salasyndaǵy jobalar úshin 7 jylǵa deıingi merzimge. Jeke bastamalar úshin eń joǵary soma 2 500 AEK nemese 10,8 mln teńge, aýyl sharýashylyǵy kooperatıvteri men qaıta óńdeý jobalary úshin 8 000 AEK nemese 34,6 mln teńgeni quraıdy.
Oǵan qosymsha kásipkerlerge jyldyq 2,5% mólsherleme boıynsha 7 jylǵa deıingi merzimge tehnıka men jabdyqtardyń jeńildikti lızıngi qoljetimdi. Bul aýyl sharýashylyqtaryna artyq qarjylyq júktemesiz óndiristik bazany jańartýǵa, ónim shyǵarý men qaıta óńdeý kólemin ulǵaıtýǵa múmkindik beredi.
Osyǵan deıin elimizde mal sharýashylyǵyna jeńildetilgen nesıe beretin jańa baǵdarlama iske qosylǵany týraly jazdyq.
