«Aýyl amanaty»: Atyraý oblysynda 192 jobaǵa qarjy berilgen

ATYRAÝ. KAZINFORM – Byltyr Atyraý oblysynda «Aýyl amanaty» baǵdarlamasyna qatysýshylardyń 192 jobasyna qarjy berilgen.

Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń málimetine súıensek, bıyl qosalqy sharýashylyqty damytý úshin 83 jobany qarjylandyrý josparlanǵan. Sondaı-aq, aýyl sharýashylyǵy kooperatıvterine jeńildetilgen nesıe beriledi. 

«Byltyr «Aýyl amanaty» baǵdarlamasy aıasynda aýyldarǵa qosalqy sharýashylyqty damytýǵa baǵyttalǵan 192 joba qarjylandyryldy. Sonyń nátıjesinde jumyssyz júrgen 36 adamnyń kásibin bastaıtyny, jańadan 199 jumys ornyn ashý kózdelgen edi. Qazir 40 jańa jumys orny qurylyp, mindetti tólemderi tólendi. Al, nesıe alýshylardan qaıtarylǵan qarjyny 1 kooperatıv pen 10 shaǵyn kásip ıesine berý protsedýrasy júrip jatyr. Joba aıasynda 908 iri qara, 1 010 jylqy jáne 1 215 qoı satyp alyndy», -deıdi Amangeldi Salamat. 

Onyń aıtýynsha, qosymsha jobalardy júzege asyrý úshin Aýyl sharýashylyǵy mınıstrligine bıýdjettik ótinim joldanǵan. 

Premer-Mınıstrdiń keńesshisi Eraly Toǵjanovtyń pikirinshe, aýyl sharýashylyǵy ónimderiniń kólemin keńeıtý qajet. Bul úshin jergilikti iri kompanııalarmen qoıan-qoltyq jumys jasaýǵa qadam jasaǵan jón.

«Máselen, Batys Qazaqstan oblysynda aýyl sharýashylyǵy ónimderine suranysty arttyrý úshin ákimdik pen «Qarashyǵanaq» kompanııasy arasynda memorondýmǵa qol qoıyldy. Atyraýda da osyndaı múmkindik bar dep oılaımyn. Sebebi, munda «Teńizshevroıl», NCOC jáne otandyq munaı kompanııalary bar. Aýyl sharýashylyǵy ónimderin halyqaralyq standartqa sáıkestendirip, iri mekemelerge usyný qajet. Bul – ımport kólemin azaıtatyn tıimdi jol», -dedi Eraly Toǵjanov.

Eske sala ketelik, budan buryn Atyraý oblysynyń fermerleri nesıege tórt túlik berý jobasyn qoldaǵan edi.