«Aýyl amanaty»: Almaty oblysynyń turǵyndary 8,2 mlrd teńgeden astam qarjy ıgerdi
QONAEV. KAZINFORM - Almaty oblysynda aýyl turǵyndarynyń tabysyn arttyrýǵa baǵyttalǵan «Aýyl amanaty» baǵdarlamasy aıasynda byltyr 8,2 mlrd teńge bólindi. Qazir qarajat tolyq ıgerildi. Baǵdarlama oblystaǵy barlyq 133 aýyldyq okrýgti qamtıdy.
Aýyl turǵyndarynyń tabysyn arttyrý jobasy aıasynda beriletin shaǵyn nesıeler - «Konaev ÁKK» AQ arqyly júzege asady. 2023 jyldyń maýsymy men osy jyldyń maýsym aıy aralyǵynda áleýmettik-kásipkerlik korporatsııasyna jalpy somasy 13,4 mlrd teńgege 1692 ótinish túsip, onyń 8 mlrd 267,6 mln teńgesi 1090 qaryz alýshyǵa bólindi.
Shaǵyn nesıeler myna baǵyttar boıynsha berildi:
– Mal sharýashylyǵy salasyna 894 shaǵyn nesıe, onyń ishinde 36 kooperatıv;
– Ósimdik sharýashylyǵyna 40 shaǵyn nesıe, onyń ishinde 3 kooperatıv;
– Aýyl sharýashylyǵyna jatpaıtyn kásipkerlik sýbektilerine 149 shaǵyn nesıe;
– Aýyl sharýashylyǵy óndiristik kooperatıvterine aýyl sharýashylyǵy tehnıkasyn satyp alýǵa 7 shaǵyn nesıe.
Almaty oblysynda 53 aýyl sharýashylyǵy óndiristik kooperatıvi tirkelgen. Onyń 46-na jalpy somasy 1 mıllıard 126,7 mıllıon teńge qarjy bólingen. Sonymen qatar, baǵdarlama aıasynda tórt-túlik satyp alyndy:
– et-sút baǵytyndaǵy iri qara – 9055 bas;
– túıe – 27 bas;
– jylqy – 2337 bas;
– usaq mal – 15075 bas.
Budan bólek ósimdik sharýashylyǵy salasyndaǵy jobalarǵa, onyń ishinde sańyraýqulaq, qulpynaı, kókónis jáne qyzǵaldaq gúlderin ósiretin jylyjaı keshenin iske qosýǵa da shaǵyn nesıe berildi.
Bıyl oǵan respýblıkalyq bıýdjetten 2011 shaǵyn nesıe berý josparymen 14 mıllıard 79,2 mıllıon teńge qarastyrylǵan. Qazirgi ýaqytta jalpy somasy 5,9 mlrd teńge bolatyn 629 ótinish túsken.
«Aýyl amanaty» baǵdarlamasynyń júzege asyrylýy aýyl kásipkerleriniń damýyna qýatty serpin boldy.
«Baǵdarlama aýyldyń ekonomıkalyq damýyna jáne turǵyndardyń ómir súrý sapasyn jaqsartýǵa yqpal etedi», - dep atap ótti Almaty oblysy ákiminiń orynbasary Rýstam Isataev.
Jobanyń jarqyn úlgisiniń biri – uıǵyr aýdanynyń turǵyny Rozıgúl Sadyqova memleket qoldaýynyń arqasynda jeke tigin tsehyn ashty.
«Kóp jyl buryn men ismerlikpen aınalysýǵa bel býdym. Koronavırýs qyzdarymdy qashyqtan oqýǵa májbúr etti, biz tigin ádisterin birge úırendik. «Aýyl amanaty» baǵdarlamasy týraly bilip, qujattarymdy tapsyryp, jyldyq 2,5 paıyzben nesıe aldym. Bul qarajat jergilikti turǵyndar arasynda suranysqa ıe túrli ónimderdi shyǵarýǵa arnalǵan qural-jabdyqtardy alýǵa kómektesti», – deıdi Rozıgúl Sadyqova.
Ákimdik «Aýyl amanaty» baǵdarlamasy jalǵasastynyn atap ótti. Bul joba aýyldy kórkeıtýge, turǵyndardyń turmysyn jaqsartýǵa úles qosyp keledi.
